Boeck van surgien

Capm. vanden ghescoerden om den navel.

Nu wil ic u scriven eerstwerven die cuere vanden buke in den navel. Die sieke sal recht staen ende hem recken ende sinen adem inhalen ende soe langhe houden dat hem die navel uut recke ende die butse haer tone. Ende dan maket teiken om den navel met inte of met colen. Daerna doet den sieken liggen averrecht op sinen rugghe ende sniit den rinc al om den navel die ghi gheteijkent hadt metten inte. Ende dan nemet een haecsken ende steket in de middewaert vander butsen ende recket opwaert ende biindet met eenen drade sterkeliic al om ende om soe dat dien draet sy ghestrict. Ende daerna clieft die butse boven [ende] sniitse af. Ende ghi sult den vingher eerst steken in die wonde ende

[p. 222]

sult tasten na den darm of hi ghebonden es metten drade of sirbus. Ende is den darm ghebonden soe ontbinten weder ende duwet den darm nederwaert uut den lichaem. Ende vindier sirbum sniit af datter overtollich is. Ende let u dat bloet yet om dat ghi hadt ghesneden enighe ader of arterien soe suldi u pinen te stelpen. Ende alst ghestelpt is soe suldi nemen twee naelden met tweevoude garens ghevessemt dat sterck is ende steecse int vleesch dat ghi eerst hadt ghesneden al doer ende al om ende om den navel cruijswiis ende bint den draet tot vier steden tegader ende doet die naelde af. Ende latet alsoe tote dat dat vleijsch verrot dat ghebonden is ende dat afvalle ende dan cureert die wonde totdat se ghenesen is.