Boeck van surgien

Capm. van steken van scorpijoenen [d'welker tweer natueren is].

Het siin twee manieren van scorpionen die eene houden haren steert opwaert ghecromt ende die vint men in spaengien ende in ytalien. Ytalien dat is alle dat lant van overberch tot grieken. Ende dit siin die meest[e ende die] gheveniint[ste] siin mer sy en sien niet die quaetste. Die ander maniere siin cleyne scorpyonen ende slepen haren steert na hem ende die vint men in oryenten bi dien lande daer men alexander in besloot ende magach ende die siin herde quaet ende gheveniint Scorpionen siin herde gheliic eenrehande dieren

[p. 206]

ende heeten scarabey sonder den steert. Ende dit dier biit ende steect ende beide beten ende steken doen den mensche sterven. Die teiken daer mense mede bi bekennen mach die beten of die steken van scorpionen dat is dat dat vleesch wort alom ende om voetstaens hert ende ghepustuleert ende root ende met groten ende met sterken sweere. Ende die sieke ghevoelt grote coude ende bi wilen grote hitte ende sweet ende grote crimpinghe dat hem alle siin liif haer [ver]crimpt ende scuddet ende bevet. Ende alle die uterste lede [als] die arme ende die hande ende die beenen ende die voeten siin verstorven van couden. Ende dan heeft hi met uren grote piin ende sweer ende siin ghemachte ende met uren vergatet hem. Ende daerom salmen al[s]men dit siet den sieken haesteliic succureren met plaesteren ende met anderen dinghen. Ghi sult nemen .i.½. dr. van coloquintida of asafetida ghesoden in wiin ende [der mede] ghetempert ende op den steec of op den beet gheleit: Item het es oec herde goet daerop gheleit van goeder trijacle ende met een luttel scamoneien: Item men sal hem maken dese confeccie: Item castorium ende die scorsen van capparis ende piritrum ende aristologie longa van elken .i. dr. ganciaen .ii. dr. dit sal men conficeren met ghedispumeerden seem ende gheven hem. ii. dr. met ouden wiin. Ghi sult weten dat men maect olie van scorpionen die alle beten of steken van gheveniinden beesten doet ghenesen als men die wonde daermede bestriict of in die wonde ghedropt: R. aristologie ganciaen die scorse vander wortel van capparis ana .i. dr. ende .i. lb. olie van bitter amandelen of van keernen van perrixsteenen ende latent daerin ligghen een weke ende dan salmen tsieden [ende salre toe doen 10 scorpione ende latent also staen ter zonne .iii. weken. Ende daerna sal ment sien] ende houdent een glasen vat ende als te doen es soe orbaert.