Boeck van surgien

Capm. vanden bloede int oge die cure.

Als dat oghe al vol bloets is van quetsinghe of van elwaer af ende dies veel is dan suldi den sieken doen laten die hooft adere ende sult legghen opt oge medecinen repercussiif totdat bloet al wech is van den oghe. Ende en gatet alsoe niet af dan suldaer opleggen medecinen die sceyden doen ende resolveren. Ende vander medecinen die resolveren ende sceyden tegader alse comin ghepulvert ende ghemenct met wasse ende [ghewarmt] opt oghe [ghe]leit. Ende dit is die maniere daer op te leggen ghi sult opt oghe legghen een wit sindael ende sult maken een

[p. 162]

plaester vanden wasse ende vanden comine ende sult die plaester doergaten te menigher stat met eenre griffien off dies ghelike ende sulse werm leggen opt oghe ende tsindael daeronder ende dit suldi dicwil verwermen tot dattet altemael vergaen sij. Het ghevalt somstont dat uvea tunica scoert ende sciet uten oghenscedel al oft waer een rosenbeijer. Ende haly seit dat die sieke met dien oghe tsien nemmermeer en mach vercoeveren. Mer die groote smerte ende weute ende steecten vergaen ende dat oghe bliift leeliic ende overtset. Ende dit is die cure daeraf dat men een naelde steken sal van onder opwaert in die wortel vanden uvea tunica en een ander ghevademt met eenen tweevoudighen drade ende stekense doer die wortel van uvea tunica op den hornic vanden oghe ende die een seldi laten steken [dair in] ende dan suldi metten eenen drade dat een deel van uvea binden opwaert ende metten anderen deel van den drade dat onderste deel uvea binden nederwaert. Ende alst al ghebonden is dan salmen die naelde uuttrecken. Ende dan salmen daerop legghen dat die aposteme versacht. Ende dit salmen laten alsoe langhe dat uvea [tunica met] die drade al afvallen van hem selven ende dan voert an cureren soe dattet ghenesen si. Ende het ghevalt oec somstont dattet doghe altemael uutsciet ende nochtan en lettet hem niet aen tsien. Ende wildise dan weder insetten soe doet den sieken laten die hoeftader todat die wonde is gheresolveert van den oghen. Ende daerna suldi doen setten ventosen sonder vliemen in den necke ende legt plaesteren opt oghe van stiptigher medecinen als van acacien ende van aloe ende van olibanum ende van sarcocolle. Ende dwinct die plaester soe vast als doghe ghedoghen mach [met vele plaesteren] ende latet tplaester ligghen [vaste ghebonden] enen dach ende enen nacht. Ende daerna besiet of dien bant ontslapt is ende is dien bant ijet gheslapt soe suldi dien bant nog vaster binden. Ende alst alsoe heeft gheleghen ghebonden eenen nacht soe suldi dat oghe ontbinden. Ende is dat oghe weder gheset in siin stat

[p. 163]

alset plach te staen natuerliic dat es goet. Ende en ist niet weder in siin stat alst sculdich is te stane natuerliic soe beginnet weder als van eerst metten plaesteren ende met den dwinghen ende metten ventoijsen in den necken sonder vliemen. Ende dit doet soe langhe dat doghe weder stae in sien stat natuerliic.