Boeck van surgien

Capm. .xx. van exteroghen te cureren.

Clavus dit is een exteroghe in dietsche ende in walsche heetet vinnit dagutse (?)

[p. 121]

ende is een hert vleesch als enen nagel ende wast geerne aen die voeten of aen die teen. Ende het let den mensch herde seer aen siin gaen. Ende dit is die cuere daer af men salt al om ende om of sniden ende dat herde doen sceiden van den vleesche ende allencken af lichten ende uut den vleesche trecken ende dan cautriseren met enen heeten jser of legt in die wonde een luttel ongheblust calck ghemenct met moruwer seepen ende met capittel ende daerna salment versoeten met soeter boteren of met verschen swinensmoute totdat die corste dier verbrant is afvalle ende dan curreert alsoe u dunct dats te doen is si siin sere volliic ghenesen. Item exterogen of doren af te doene sal men den voet ierstwerf wassen ende weiken in warm water ende honich ende dan salment boven een luttel op scaven of sniden ende dan sal men op dien doren leggen een plaester van onghepiinder hersen op een leder.