Logo DBNL
De spiegel der minnen (1913)

De spiegel der minnen

(1913)–Colijn van Rijssele–rechtenstatus Auteursrecht onbekend

Vorige Volgende

Hier beghint dat derde spel vanden spieghel der minnen.

Diericx oom woonende te Dordrecht.
 
O wv wat jammerlijcker saken/
 
Noyt so bescaemt hoe sal ict maken/
 
Dat Dieric die hollandere dus gaet al quelende?
 
Hy is bedect/ zijn lijden helende
2220
Wie weet wat hem nu deeren mach?
 
Hy en hadde zedert noyt ghesonden dach/
 
Dat hy hier te Dordrecht quam in stede.
 
Hy heeft onghenoechte dat merck ick mede/
 
Want wat blij schappen dat hy aensiet
2225
Van Venus discipulen dats hem al niet.
 
Tcomt hem alleleens weert snoec oft blieck// is.
 
Macht oock van minnen zijn dat hy sieck// is?
 
Wa neent/ want waermen van liefde craeyt/
 
Hy achtet recht als een wint die waeyt.
2230
Nochtans soo twijfelt my als van dien/
 
Ick sal zijn water gaen doen besien/
 
Om hem te helpene: naer dat dus staet
 
Dus wil ick tot den meester gaen om raet.
Dierick sieck sittende.
 
O stranghe fortuyne: o wy wat brast// ghy/
2235
Mijn sinnen beclast// ghi/ met siecten verlast// ghy
 
Den lichaem: die in tgrief ghevast// sy+
 
Van ongherieve.
 
Vierich verlanghen altijt mijn gast// sy
 
Hoe wreedelick tast ghy/ op my soo bast// ghy
2240
Als ritsighe teve: dies ick ontpast// sy
 
In swaren miskieve.
 
Ghy steelt my/ als donnaerdighe dieve/
 
Playsance van lieve// des tuycht die brieve/
 
Eeuwich verscheyden te zijne van lieve/
2245
Noyt pijne soo swaer:
 
Dus dunct my elck huere wel seven jaer.
 
Tscijnt dat den tijt vast achter waert springt/
 
Den dach verlingt// die sonne blingt
 
Langher dan haren loop verstringt/
2250
Noyt craneker virtuyten.
 
Comt duysterheyt die den dach verdringt/
 
U liedeken singt// dat hem bedwingt
 
Elcken dach dat my druck in bringt
 
Tot eender minuyten.
2255
Al hoor ick alle vruechdelijcke conduyten/ aant.
 
Santorien en fluyten// harpen en luyten
 
Tis al niet ick vinde ghesloten buyten
 
Mijn lief eerbaer:
 
Dus dunct my elck huere wel seven jaer.
2260
Die maent lijdt vaste/ den dach die naect/
 
Daer therte naer haect// vierich ghestaect
 
Duer tderven haers wesens wel gheraect
 
Volmaect in trouwen.
 
Oft die groote siecheyt die my blaect
2265
My so mismaect// ter herten schaect
 
Dat ick den dach daer sy naer waect+
 
Niet en can ghehouwen?
 
Ick weet wel therte breect my van rouwen/
 
Hoe sal ict dan brouwen// in eenigher vouwen
2270
Dat ick met vruechden mochte aenschouwen
 
Haer aenschijn claer?
 
Want elck huere dunct my wel seven jaer.
 
Princesse van trooste moet ick u derven:
 
Als ghebroken scherven
2275
Moet ick verdwijnen int openbaer.
 
Vierich verlanghen wilt my duerkerven/
 
Ter doot doen sterven.
 
Dus dunct my elck huere wel seven jaer.
De oom tot den medecijn sprekende.
 
Ghegroet zijt meestere.
Med.
 
Sijt willecome vrient.
Oom
2280
Mijn jonste vloeyt tuwaert.
Med.
 
Dats onverdient.
Oom
 
Ghy moet my dit water gaen besien
 
Ick salt u wel loonen.
Med.
 
Het sal u gheschien.
Oom
 
Ic hebbe becoringe wat die mensce deeren// sal
 
Dien twater toebehoort.
Med.
 
Ick salt u vercleeren// al+
2285
Byder gracien Gods in duechden gheeert/
 
Soo ons Hypocrates/ Isack/ Vergilius leert/ aant.
 
Ptholomeus/ Galienus ende Aristoteles
 
Die vander naturen een meester es.
 
Sanguis/ sperma/ tuycht inder waerheyt/
2290
Dat hy van melancolieuse swaerheyt
 
Alder meest ghecomplexioneert// is/
 
Die dit water toebehoort/ hoet gestudeert// is:
 
Soo contenten ende resolutien bewijsen. aant.
 
In dit water en sie ick vlieten noch rijsen
2295
Sanies/ Pili/ noch squame daer toe
 
Rubeus color naer dat ick bevroe
 
Is dit water naer de ghedaente van wijne
 
Die onderroert is.
Oom
 
Wat plach dat te zijne
 
Lieve meester verclaert ons dat bysondere?
Med.
2300
Het betuycht ons een abuselick wondere/
 
Hoe naer dat ick twater noch bekinne.
 
Niger color die vlieter oock inne/
 
In de gedaente van swarte hoornen blinckende/
 
Die de natuere is seere vercrinckende:
2305
Het verberret den lichaem/ het ontsteket bloet/
 
Nochtans hoet ghestudeert zijn moet/
 
Uut swaters ghesichte nae der schriftueren/
 
Soo en vindick niet dat hy nae der natueren/
 
Eenighe quetse heeft van binnen/
2310
Dan inwendighe smerticheyt der sinnen/
 
Die den lichame int merch wort een quetsele.+
Oom
 
Wat siecten ist dan?
Med.
 
Tis sulck een letsele/
 
Dat den mensce dies versuft wort ende rasende/
 
In verwoetheyt buyten memorie dwasende.
2315
Daer zijn hondert menschen by bedorven/
 
Onteert ende desperaet ghestorven.
 
Exempel merct hoe Echo van drucke/
 
Om Narcissus sterf tot haren onghelucke:
 
Ende hoe Narcissus int grief seer stranckt/
2320
In eender fonteynen hem selven verdranck.
 
Ghelijck als Ero recht min noch meer mee
 
Duer Leander haer selven verdranc in de zee.
 
Merct voort hoe Dydo duer tonghemack
 
Om Eneas den ridder haer selven duerstack/
2325
Ende wierp haer selven daer naer int vier:
 
Tis een evel soo fel ende puytertier/
 
Dat alle tormenten te boven gaet.
Oom
 
En isser gheen boete teghen?
Med.
 
Trouwen heere jaet.
Med
 
Soo u van my verclaert sal wesen.
2330
Gheen medecijn en mach hem ghenesen/
 
Den mannelijcken persoon daer ghi na vraecht:
 
Dan den azem van eender suyver maecht.
 
Welcke asem hem alleene mach gheven
 
In deser siecten tsterven ende tleven.
2335
Ende dier maechden en isser maer een nochtan
 
In de werelt/ die hem ghenesen can/+
 
Met die medecijne ghenoemt als voren:
 
Siet wat ghy doet.
Oom
 
Dats vreemt om hooren.
 
Ende hoe salmen onder rijcke ende ele/
2340
Dit maechdeken kennen/ men vinter soo vele/
 
Tot zijnen confoorte ende niemant el?
Med.
 
Sijn vierich begheeren die kentse wel:
 
Niet naerder en can iet u bedien.
Oom
 
Hout daer meester/ het wert noch bet versien/
2345
Wordt hy ghenesen van deser swaerheyden.
Med.
 
Die gracie Gods wil u gheleyden/
 
Ende laet u ten eynde u leet verwinnen.
 
Heere God hoe is hy ghequelt van minnen
 
Die mensche wiens urijne ick sach:
2350
Hy sal ducht ick int eynde betalen tghelach.
Kath.
 
O wy hoe ben ick gheinflammeert
 
In tvierich begheeren gheconfirmeert
 
Mijns liefs: daer jonste in jubileert
 
Met herten met sinne.
2355
Tis heden den dach diet wel grondeert/
 
Dat hy/ die my vast verconforteert
 
Sou comen/ dies therte laboreert/
 
Solaes hier inne.
 
Nochtans dat twijfel vast argueert
2360
Dat hope van trooste haer abuseert+
 
Roepende ick worde ghetrompeert
 
Van dien ick minne:
 
Ende dat hy den dach gheordonneert
 
Versuymen sal als diet cleene gloseert
2365
Dies sorghe nature heeft verturbeert
 
In onghewinne.
 
Waer blijft hy daer therte in accordeert?
 
Boven al dat Venus boeck studeert
 
Sal ic van hem zijn met woorden gestoffeert/
2370
Mijn vruecht wordt dinne.
 
Ick sie dat nu den dach passeert/
 
Den nacht is ons ghearriveert/
 
Die mane haer claerheyt nu fineert
 
Int shemels tinne.
2375
Hy en comt niet dies therte lamenteert:
 
Dus houdick my selven gherefuseert
 
In ongheachter liefden verneert
 
Als een ghecraechde hinne.
 
O valsch man horrible ghediffameert
2380
Dat ghy my met trooste dus tempteert
 
Dies blijve ick eeuwelijck ghedoleert
 
Wes ick beghinne:
 
Ontfermt mijns hemelsche coninghinne.
Pausa.
Dier.
 
O plaghe van siecten venijnighe beeste/
2385
Die met tempeeste
 
Van misquamelijcker oreeste
 
Mijn herte plaecht.
 
Van alle dangieren zijt ghy de meeste:+
 
Met droeven gheeste
2390
Roepe ick dies wrake inden foreeste/
 
Daer ghejonsticheyt jaecht.
 
Mijn1) herte dat beeft verschrict versaecht/
 
Het karmt het claecht:
 
Want ick hebbe lacen twelc my mishaecht/
2395
Hoe sal ict coken?
 
Mijnen dach versuymt/ mijn trouwe gebroken.
 
O man valsch argher dan Judas ghebroet
 
Dat ghy dit doet
 
Den ghene/ die ghy in rechter ootmoet
2400
Ghejonstich kent
 
Dats blaemte: want in der minnen vloet
 
Haer hertsen bloet
 
Soudse my offeren/ dit ben ick vroet/
 
Voor een present.
2405
O doot doot/ afgrijselick serpent
 
In dit torment
 
My verslint: ick hebbe in Venus convent
 
Valschelijck ghesproken/
 
Mijnen dach versuymt/ mijn trouwe gebroken.
2410
Och nu sal dit lievelick aenschouwen/
 
Bij deser ontrouwen/
 
My lacen voor vileynich houwen:
 
Dits tswaerste van al.
 
Mijn ooghen leken my van rouwen/
2415
Hoe sal iet brouwen/
 
Daermen die edel bloeme van vrouwen
 
Mede paeyen sal?
 
Ick hebbe den vileynighen bal/+
 
Ghejaecht int dal
2420
Van ontrouwen: dies blijf ick int ongheval
 
Al wordet ghewroken/
 
Mijnen dach versuymt/ mijn trouwe gebroken.
 
O princesse schoon bloeyende rosemarijne/
 
Ick ligghe in pijne/
2425
Duer tderven van uwen blijden aenschijne/
 
Mijn hemelsche vruecht.
 
Nu versuym ick mijnen dach by u te zijne/
 
O Katherijne.
 
Wat sult ghy meynen? de schuit is mijne/
2430
Tis mijnder onduecht:
 
Och lacen ten is/ hoe wel ghijt peynsen muecht/
 
Ick ben vervuecht
 
Met siecten: duer tderven van u reyn juecht.
 
Dus duer dit bestoken
2435
Heb ic mijnen dach versuymt/ mijn trou gebroken.
Begh.
 
Dats groote schande.
Vree.
 
Dat ist voorwaer.
Begh.
 
Sy wringt haer handen.
Vree.
 
Noyt sulck misbaer.
Begh.
 
Haer maechdelijck haer/
 
Trectse uut haren hoofde van drucke.
Vree.
2440
Sy mach wel claghen van onghelucke.+
Dier.
 
Eylacen wat hoor ick u daer vermanen?
Vree.
 
Sy wascht haer aenschijn met heete tranen.
Dier.
 
Och dies rolt mijn blij schap uuter banen/
Begh.
 
Haer jonste vervliecht als reygers en swanen.
Dier.
2445
O wy wat hoor ick noyt meerder cleynicheyt.
Begh.
 
Tis onnatuerlijck.
Vree.
 
Tis seg ick vileynicheyt.
Begh.
 
Soudt ghy bedrieghen die u bemint?
Vree.
 
Tis Judas werck.
Dier.
 
Och lacen ick bekint:
 
Vermaledijt moet die siecte wesen/
2450
Diet my ghedaen heeft.
Vree.
 
Wat segdy van desen?
Begh.
 
Dat en is gheen onschult.
Dier.
 
Noyt sulck ghequel.
Vree.
 
Daer een man zijn wil/ hy comter wel.+
Begh.
 
Dats een woort van oude tijen.
Vree.
 
Ghy hadt te schepe wel mogen derwaert rijen/
2455
Hadden u die beenen niet willen draghen.
Begh.
 
Ghy zijt den oorspronck van deser plaghen.
Vree.
 
Tis seg ick u schult.
Begh.
 
En wat batet ghekeven?
Vree.
 
Haddet haer met brieven over gheschreven.
Begh.
 
Soo en waert gheen noot.
Vree.
 
Tfy u der blamen.
Begh.
2460
Tis al bedorven.
Vree.
 
Ke jaet in sduyvels namen.
Begh.
 
Men sals u eeuwelick schande spreken.
Vree.
 
Tis al verraderije.
Begh.
 
Tzijn vileynighe treken/
 
Waerment vermaent.
Vree.
 
Veel arger dan moort/
Sygaen binnen.+
Dier.
 
Och noyt dus becoort// druckich ghestoort/
2465
Vreese voor schande werpt over boort/
 
Alle mijn solase.
 
Dat dit blamelic woort// mijn herte aenhoort/
 
Daer blijvick by voort// in drucke versmoort/
 
Als dallendighe dwase.
2470
Mijn sijs comt nu tot eenen ase/
 
Men acht my als ghebroken glase/
 
Niet waert een blase// soo is mijn leven.
 
Sal ick dies tspel verloren gheven
 
Al is my die caetse nu ontschreven?
2475
Soo mach ick wel beven// van grooten vare.
 
Neen: vaert wech gepeyns blijft hier verdreven
 
Recht als die mijn waertste lief verheven/
 
Mach hebben beseven// troost int openbare.
 
Ick wensche haer duysent mael een goet jare/
2480
Ick cusse die vlechten van haren hare/
 
Voor taenschijn clare// haers wesens schoone/
 
Als die monstrancie van Venus outare:
 
Dies ick mijn druckich lijden spare/
 
Hoe ick besware// sy crijcht te loone/
2485
Ghestadige vrientscap van mijnen persoone/
 
Boven al die levendich zijn beneden den throone.
Pausa.
Saturnus, by hem hebbende een groote ketele daer jalours ghepeyns inne verborghen leyt, spreect,
 
Ick brasse ick brouwe/ ick blase ic stoke/
 
Als Saturnus/ tis wonder wat ic coke/
 
Hier in de ketel der memorien.
2490
Blijschap verstelle ick in crancker victorien/+
 
Soo Scorpius twater verkeert in ijse:
 
Katijvicheyt/ rampspoet is mijn devijse/
 
Crochen/ stenen/ weenen/ suchten/
 
Claghen/ karmen/ vreesen/ duchten/
2495
Soot eeuwich beroeren gheeft conditien/
 
Naer zijn rechtvaerdighe punitien:
 
Ende soo smenschen wille gheeft consent/
 
Soo brou ick een beroerlijck torment/
 
In smenschen memorien alsoo ghy siet:
2500
Maer wat ick brouwe/ tis min dan niet.
 
Al coom ic met droefheden ter herten gestreken
 
Des menschen wille die macht al breken:
 
Maer dicwils rollen sy uuter banen/
 
En verkiesen ravens voor wilde swanen:
2505
Want tallen hueren miskief soo spou ick
 
Inder memorien: raet wat brou ick
 
Met viere van ontrooste? noyt sulck engien/
 
Het is jalours ghepeys: springt uut laet u sien.
 
Als die blicxem door den vlammigen dondere.
Jal.
2510
Wat isser gaens?
Sat.
 
Een abuselijck wondere
 
In tverstoken der minnen brandere:
 
Katherina sheermertens en Dieric den hollandere
 
Moet ghy gaen beclippen met jalousyen:
 
En met crancken betrouwene so op hem ryen/
2515
Datse haer sinnen desperaet// terden
 
In verwoetheden quader dan quaet// werden.
 
Het is tijt eer datmen den pot meer schuymt/+
 
Dierick die heeft sinen dach versuymt/
 
Sijn ghelofte ghebroken/ daer sy naer wacht/
 
Haer dunct dat hy haer niet en acht:
 
Dus vallet tuwaerts juyste in de clincke.
 
Spoet u derwaert/ beclipt die vincke/
 
Neemt vreese voor schande tot uwer baten/
 
En begheerte van hoocheden.
Jal.
 
Ick en sals niet laten/
2525
O Saturnus in droefheden hoochst verheven.
Sat.
 
Siet dat die carre wel wort ghedreven/
 
Datse die bitter doot daer om smaken:
 
Siet scherp toe wilt naerstelijck waken
 
Hier moet ghy na haken// eer tlijden stelpe.
2530
Neemt Mars gramschappe tot uwen helpe/
 
En wanhope die Judas de kele af beet/
 
Met hovaerdije die Lucifer tonder smeet:
 
Dits mijn beheet// bewaert de saken/
 
Fortuyne die radet.
Jal.
 
Ick salt wel maken/
2535
Oorlof Saturnus wy willen scheyen.
Sat.
 
Mijn cracht van droef heyt moet u gheleyen/
 
Dat ghy cloeckelijck int labuer moet slaven.
Jal.
 
Nu wil ick nae Middelburch gaen draven/
 
En helpen Katherina haer carreken lichten.+
2540
Ick sal meer onruste in twerck gaen stichten/
 
Dant serpent int paradijs oyt wrachte/
 
Besmettende al tmenschelick gheslachte.
 
Opdat ick jalours ghepeyns ghenaemt// sy:
 
Want menich minnaer duer mi bescaemt// sy/
2545
Als ick met ontrouwe come ten ghebrasse.
 
Hola/ noyt dinck soo wel te passe:
 
Ic sie begeerte van hoocheden en vrese voor scande
 
Die solaesheyt van lieve houden te pande:
 
Daer werp ick my ondere twordt al profijt.
Begh.
2550
Wa jalours ghepeyns/ groot willecome zijt/
Vree.
 
Waer sydy op weghe?
Begh.
 
Dat en dorfdy niet vraghen.
Vree.
 
Comdy dus Venus discipulen plaghen/
 
Als honden die knagen// aen tdolende schaepken?
 
Segt ons dat neve.
Jal.
 
Al gheraden paepken/
2555
Hoe mocht u dit comen int ghedochte?
Vree.
 
Heb ict dan ghevonden?
Jal.
 
Ja ramp hebbe diet sochte.
Vree.
 
Tenees a vous.
Jal.
 
Prenez en gre+
 
Cest pour vous deux.
Begh.
 
Ick en deele niet me.
Jal.
 
Waeromme?
Begh.
 
Ten is mijnen coop// niet.
Jal.
2560
Ick werpet ghemeenlick inden hoop// siet.
Vree.
 
Jae en stelt u selven uut den brande.
Begh.
 
Ick ben begheerte van hoocheden.
Vree.
 
Ende ick vreese voor schande.
Jal.
 
En ick ben jalours ghepeys in tknoopken.
Begh.
 
Wa dits een soortken/
Vree.
 
Wie copet hoopken?
Jal.
 
Tis recht goede vracht.
Begh.
2565
Sleyptse sonder zele.
Vree.
 
Die beste van ons allen en duecht niet vele.
Jal.
 
Dats om dat elck een druckelijck lyen// heeft.+
Begh.
 
Cruyce oft munte wie ons dryen// heeft
Vree.
 
Ick had liever te verliesen dan te winnen.
Jal.
2570
Crijghen dees twee haer broot met spinnen?
 
Sy proncken al warent twee spaensce cauwen.
Begh.
 
Thooft is vrouachtich.
Jal.
 
Wat segdy van grauwen/
 
Dravense qualijck vanden stalle?
Vree.
 
Recht als twee goddinnen van onghevalle/
2575
Aen den lichame oft ander arme sielen
Jal.
 
Neen als twee tortelblessen met beseyete hielen/ aant.
 
Ergher dan eenighe wolfs jonghen.
Vree.
 
Wat duyvel gady maken?
Begh.
 
Wat? noyt gheen gheckere.
Vree.
 
Wat rampe die duyvel beschaemt den neckere.
Begh.
 
Hoort jalours ghepeyns.
Vree.
2580
Ghy zijt Judas saet
Begh.
 
Ghy bedroeft dat herte.+
Vree.
 
Ghy zijt quader dan quaet:
Begh.
 
Ghy naeyt uwen naet/
 
Dies menich minnare valt desperaet.
Jal.
 
Ja wat braste ghye?
Vree.
 
Hout op hout op.
Jal.
2585
Begheerte van hoocheden jaecht inden top/
 
Den menighen met verwaenden wille.
Vree.
 
Dus climt ghy naer hoocheyt.
Jal.
 
Ja metten brille
 
Van onbeleefthede/ seere verduystert.
Vree.
 
Dan valt hy al lachende.
Jal.
 
Daer katijvicheyt luystert/
2590
Dies menich uut wanhopen hem selven in tcrijt
 
Verhangt/ verdringt en vermoort seer subijt/
 
Ghy muecht wel swijghen.
Begh.
 
Nu dat laten wy vlieghen.
Jal.
 
Ende vreese voor schande/
Begh.
 
Die cant al bedrieghen:+
 
Sy maect gheveynstheyt die wonder doet
2595
Somtijts ist quaet/ somtijts ist goet/
 
Naer dat fortuyne int ooghe gheraect.
Jal.
 
Wil ick u segghen dan watse maect?
Begh.
 
Ja ghy/ wy moeten te samen schatten.
Jal.
 
Sy maect van heymelijcke camer catten/
2600
Al enghe maechdekens.
Begh.
 
Ke swijcht seg ick sotteken.
Jal.
 
Sy vercoopt menich ghebroken potteken/ aant.
 
Voor goet ende gave.
Begh.
 
Laet staen dat wantelen.
Jal.
 
Vreese voor schande cant al bemantelen/
 
Al drincken dees meyskens van calewaerts biere/
 
Alst buycxken plat blijft. aant.
Begh.
2605
Ja dats de maniere.
Vree.
 
Schamele noodtruft en is gheen leckernije.
Jal.
 
Men steect oock menighe steke op zije/
 
Die ghy verdonckert.
Vree.
 
Wie soude dat spijten?+
Begh.
 
Wy en dorven malcanderen niet verwijten.
Jal.
2610
Naer dat de waert is/ verleent hem God gaste.
Vree.
 
Tis al tout ung.
Begh.
 
Daer hebdijt vaste.
Jal.
 
Wy werpen onraste/
Vree.
 
In twerck van minnen.
Begh.
 
Waer labueren wy dan?
Jal.
 
In smenschen sinnen.
Vree.
 
Wat gaen wy beghinnen.
Begh.
 
Wat sullen wy voort stellen?
Jal.
2615
Ick wil gaen twee ghelieven quellen/
 
Van Middelburch.
Vree.
 
Dats seg ick een andere.
Begh.
 
Katherijne sheermertens?
Jal.
 
Ja en Dierick de hollandere.+
Vree.
 
Daer wil ick oock wesen.
Begh.
 
Ende ick oock voorwaer.
Jal.
 
Niet meer van desen.
Vree.
 
Nu gaet tot daer.
Jal.
2620
Neen ic wil te Middelburchwaert gaen scadden
Vree.
 
Ende ick met u.
Begh.
 
Neen dat zijn padden/
 
Ick wil te Dordrecht wesen in tstadt.
Jal.
 
By Dierick den hollandere?
Begh.
 
Ghy sluytet vat/
 
Dits wech.
Vree.
 
Adieu.
Jal.
 
Bewaert die saken.
Vree.
 
Houdet yserken laeu.
Begh.
2625
Ick en sals niet laten.
Jal.
 
Doet hem aen een nieu mutse gheraken.+
Vree.
 
Dits wech.
Begh.
 
Adieu.
Jal.
 
Bewaert die saken.
Begh.
 
Saeyt cranck betrouwen.
Jal.
 
Daer sal ick om waken.
Vree.
 
Katherina salt proeven.
Begh.
 
Tsal haer cleen baten.
Jal.
2630
Dits wech.
Begh.
 
Adieu.
Vree.
 
Bewaert die saken.
Jal.
 
Houdet yserken laeu.
Begh.
 
Ick en sals niet laten.
Vree.
 
Hier mede so lopen wy onser straten/
 
Toestoken om onse doloruese cueren/
 
Recht als verraders der natueren.
Pausa.
Kath.
2635
O werc van ontrouwen venijnige drake/
 
Wrake// roep ic dat ghi dus quellic zijt:+
 
Vermaledijt// sy tgrief daer ick in wrake.
 
Wrake// nu derve ich vruecht ende jolijt/
 
Vermaledijt// sy die gheveynsde sprake
2640
Wrake// over Dierick den ypocrijt.
 
Vermaledijt// moet die liefde zijn die ic smake.
 
Wrake// dat Venus my tonder strijt/
 
Vermaledijt// sy eeuwich dach huere en tijt.
 
O alder horribelste duecht versmadere/
2645
Verradere// vileynich erch besluytere/
 
Looftuytere// gheveynst quader dan quadere/
 
Verradere// venijnich vruecht vermuytere/
 
Looftuytere// ontpluyckende der jonsten adere/
 
Verradere// werct ghy als goet ruytere?
2650
Looftuytere// daer ick u jonste vergadere?
 
Verradere// sydy mijns drucx inspruytere?
 
Looftuytere trompeerder/ bedriechlic stuytere.
 
Och nu moet ick sonder toeverlaet/
 
Desperaet// blijven in tgrief ghenoost;
2655
Onghetroost// sonder confoort oft raet/
 
Desperaet// dat Dierick my niet en gloost/
 
Onghetroost// in vileynighe daet.
 
Desperaet// ghy herte ende sin vervroost/
 
Onghetroost// noyt gheen tyran so quaet.
2660
Desperaet// als ghy/ wiens aenschijn bloost/
 
Onghetroost// ende valsch in u propoost.
Jal.
 
En wist ghy dat niet?
Kath.
 
Eylacen neen ick.+
Jal.
 
Soudy mans ghelooven?
Kath.
 
Och ja ick dies ween ick.
 
Dat my de tranen duer dooghen springhen.
Jal.
2665
Hy moet elders vanden lijve dinghen/
 
Ghy zijt inden sondachs hoeck ghedreven.
Kath.
 
Wacharmen wat segdy.
Jal.
 
Tis seg ick een leven/
 
Te Dordrecht te zijne.
Kath.
 
Och noyt crancker profijt.
Jal.
 
Daer zijn veel schoonder vrouwen dan ghy zijt.
Kath.
2670
Trouwen dat ken ick.
Jal.
 
Wat meendy dan/
 
Dat ghy sout crijghen soo rijck eenen man?
 
Ke neen ghy/ hy weet al bet te doene.
Kath.
 
Dat weet ick wel:
Jal.
 
Hoe sydy dan soo coene/
 
U herte aen sulck eenen man te legghene?
Kath.
2675
Eylacen dat en weet ick u niet te segghene.
 
Maer ymmers ben ick in tstrick gheraect/+
 
Der reynder minnen.
Jal.
 
Ghy hebbet wel ghemaect/
 
Men acht op u als wint die daer waeyt.
Kath.
 
O wy wat hoor ick noyt soo mispaeyt.
2680
O aerde ontluyct u/ o aerde verslont// my/
 
Die nu in Venus strick ghewont// sy/
 
Vanden ghenen daer therte ende sin op lacht.
 
Waer is Dierick die mijns niet en acht?
 
Dies mijn vruecht ende welvaert moet verdwinen.
Jal.
2685
Bylo hy leyt erghens by ander concubijnen/
 
Met vruechden arm in arm en worstelt.
Kath.
 
O jalours ghepeyns hoe wreet gheborstelt/
 
Sijt ghy/ die therte duervlamt met rouwen:
 
En macht oock waer zijn?
Jal.
 
Jaet by mijnder trouwen.
2690
Hoe sou Dieric gehouwen// zijn lustige sinnekens/
 
Hy en soudse onder Venus goddinnekens/
 
Oorboren? sy zijn soo goedertieren/
 
Sy lopen met drien jae met vieren
 
Hem naer: hy en weet hem waer onthouwen.
Kath.
2695
Dat mach wel zijn.
Jal.
 
Hy heeft wensch van vrouwen/
 
Hy lijdt hem al etende/ hy en derf niet claghen.+ aant.
 
Ghy en sout haer thantwater nauwelijc dragen
 
Van scoonheden/ die hem alle huere bereet// zijn.
Kath.
 
O jalours gepeys hoe muechdi dus wreet// zijn
2700
Dat ghy met ontrouwe comt ten gheduene:
 
Mijn herte faelgeert my.
Vree.
 
Hoort dien hoerensuene
 
Hy soude seg ick hondert menschen bederven.
Jal.
 
Staet uut den winde sy mochter af sterven/
 
Sy leyt in onmacht/
Vree.
 
Breect op haer tanden/
2705
Haer ooghen verduysteren.
Jal.
 
Hoort vreese voor schande/
 
Comt helpt my tvier vast onder de wint blasen/
 
Ick salt oock toestoken.
Vree.
 
Twijf sou rasen.
Jal.
 
Men moet doen alsoot fortuyne vermaende.
Vree.
 
Tsus seg ick, haer neve comt hier gaende/
2710
Hem deert dat sy dus droeffelijck siet.
Neve
 
O wy wacharmen wats hier geschiet/
 
Noyt sulck verdriet.
 
Mijn nichte leyt hier in onmachte gesleghen.+
 
Haer selfs en weet ick gheen bediet/
2715
Wee hem diet riet:
 
Dat sy dees quetse hier heeft ghecreghen.
Katherina in onmacht legghende, waent dat Dierick voor haer staet.
 
Ey valsch vileyn.
Neve
 
O bloeme vol seghen/
 
Wat is u? gheeft my dies versinnisse:
 
Uus hertsen begheeren sal ick pleghen.
2720
O wy wacharmen sy en heeft gheen kinnisse:
 
Nu crijch ick in therte drucx ghewinnisse/
 
Duer tjammere dat ick hier moet aenscouwen.
Kath.
 
Wech wech bedrieghere.
Neve
 
Noyt meerder schinnisse/
 
Spreect my doch toe reyn bloeme van vrouwen:
2725
Ick sal u ghejonstich blijven in trouwen.
 
Och sy leyt in onmacht al waerse doot.
Kath.
 
Ey liefde liefde.
Neve
 
Noyt soo veel rouwen.
 
Therte verschrict my duer den noot/
 
Mijn ooghen tranen van jammere groot/
2730
Dat sy dus crijt/ wil God ontfermen:
 
In onmachte blijvende/ noyt swaerder stoot.
 
Elck jonstich herte macht wel bekermen/
 
Die liefde draecht.
Kath. tot haer selven comende.+
 
O wy wacharmen/
 
Wats mijns/ ghenadige moeder ons Heeren.
2735
Therte versmelt in druckelijck swarmen/
 
Al desperaet berooft van eeren.
 
Mijn vruecht moet nu in drucke verkeeren/
 
Mijn troost loopt lacen tot eenen inde.
 
Tfy liefde vermaledijt verseeren/
2740
Daer ick ontrouwe en bedroch in vinde.
Neve
 
Wat is u reyn lievelijcke gheminde/
 
Dat ghy alleene bedrijft dit misbaer?
 
Conforteert u.
Kath.
 
Ey wie is daer/
 
Ick verschricke als tlam voor swolfs verdriet.
Neve
2745
Ick bent nichte.
Kath.
 
Ick en sach u seker niet/
 
Dies ghy my lacen vervaert ende schu// vont.
Neve
 
Dat gheeft my vreemde daer ick by u// stont.
Kath.
 
Stondy by my?
Neve
 
Jae ick schoon maecht.
Kath.
 
Eylacen o wy.+
Neve
 
Weest onversaecht/
2750
Segt wat ghy jaecht// dat ghy dus claecht/
 
En u selven plaecht// ontghevende den moet.
Kath.
 
Ick en claghe niet neve.
Neve
 
Trouwen ghy doet/
 
Ghy corrumpeert uus hertsen vruecht:
 
Ghy verslijt u welvaert ende u juecht:
2755
Ghy vermaledijt u selven/ wat hebdy voren?
 
Wanhopich ende desperaet versworen.
 
Ick hebt al staen hooren// voor die camere/
 
Hoe ghy in onmachte sloecht duert jamere/
 
Noyt onbequamere// werck certeyn.
2760
Ghy hiete my bedrieghere ende vyleyn/
 
Daer ghy in onmachte laecht ghevallen:
 
Ey liefde/ liefde/ was uwen roep met allen/
 
Oft doot/ doot/ lacen twy versmoor ick?
 
Ghy en connes niet gheloochenen.
Kath.
 
Eylacen wat hoor ick/
2765
Ten staet my niet voren dat ict oyt sprack.
Neve
 
Daer moet eenich voghelken zijn int dack/
 
Sonder reden en spreectmen sulcken woorden// niet.
Kath.
 
En treckes tot uwen boorden// niet/
 
Ten gaet u niet aen.
Neve
 
Neen/ ick moet die man// zijn.+
Kath.
2770
Ghy en zijt voorwaer.
Neve
 
Segt wie macht dan zijn?
Kath.
 
En belchs u niet neve ick moetet helen.
Neve
 
Jae wildy dan heymelijcke brocxkens stelen/
 
In Venus boomgaert?
Kath.
 
Eylacen neen ick/
 
Tware vylonye.
Neve
 
Ghy wilt dat meen ick.
Kath.
2775
By uwen oorlove.
Neve
 
Swijcht tis al wint/
 
Elckerlijck weet wel dat ghy bemint/
 
Dierick den hollandere.
Kath.
 
Die dat bevint/
 
Macht wel vermonden.
Neve
 
Hoe ghijt ontkint
 
Wy hebbent bevonden:
2780
Maer tsal secreet blijven tallen stonden.
Kath.
 
Wil ict verbergen? neen ic/ naer dattet dus breet
 
Nu staet: ic moet dat lijden/ want hijt wel weet.+
 
Wat wil ick veel lieghen vercooren neve/
 
Tis Dierick daer ick by sterve en leve/
2785
En solaes begheve// o wy o wach.
 
Twas de ghene doen ick in onmachte lach/
 
Die ick aensach// tdochte my figuerlijck:
 
Dus riep ick op hem met woorden stuerlijck/
 
Vileyn/ bedrieghere/ ghediffameert:
2790
By redene/ hy heeft my ghetrompeert/
 
Want lacen hy en acht my niet een stroo:
 
Vercoren neve.
Neve
 
Wacharmen hoe soo?
Kath.
 
Hoe soo? hy heeft my in tnette ghetoghen
 
Der reynder minnen/ ende dan bedroghen.
2795
Hy beloofde my lacen twelck ick beclaghe/
 
Te comen tot eenen ghenoemden daghe:
 
Welcken dach dat hy ghebroken heeft.
 
Dies hy mijn herte vol drucx beloken heeft/
 
Omdat hy my dus ter lueren gheset heeft/
2800
Als een vileyn.
Neve
 
Wat hem ghelet heeft/
 
Is alte misselijck vercooren nichte.
 
Verhuecht u reyn maechdelijck ghesichte/
 
Hy is lichte// twelcke men cleen telt/
 
Met doloreuse siecten ghequelt:
2805
Qualick ghestelt om erghens te gane.
Kath.
 
Sulcken ontschult heeft my luttel ane/+
 
Al waer hy van siecten onghesont/
 
Hy soud my ontbieden teenigher stont:
 
Op dat zijn jonste te mywaerts ghenegen// is.
2810
Maer neense: dies vander hant gheslegen// is
 
Die voorleden vrientschap in feyten van eeren.
Neve
 
Sijt te vreden den wint sal keeren.
Kath.
 
Boven al soo claech ick/ twelck ick my scame/
 
Dat ick oyt gaf (want dat niet en betame)
2815
Een vlechte van mijnen hayre ghesneden:
 
Op ghestadighe vrientschap vol reynicheden.
 
Want by deser ghiften mach elc verwecken/
 
Corruptie van oneeren.
Neve
 
Hy salt wel decken/
 
Dat ghy der oneeren sult ontspringhen:
2820
Want hy secreet is van allen dinghen.
 
Maer u vierich verlinghen/ valt al te fel/
 
In crancken betrouwene.
Kath.
 
Ick weet harde wel/
 
Dat hy andere vrouwen beminnen// moet.
 
So sulcx dat experientie bekinnen// doet
2825
En die sal hy die vlechten van mijnen hare
 
Nu gheven: dies therte sterft van vare:
 
Ende beroemen hem lacen noyt sulck misval/
 
Van onser liefden: daer houwet my al.
 
Const ick mijn vlechte weder ghecrijghen
2830
Soo en truerde ick niet.+
Neve
 
Wilt hier af swijghen/
 
Tis jaloursheyt die u ter herten nopen moet.
 
Op een verbeteren men altoos hopen moet.
 
Ick en hoorde noyt anders dan hy certeyn is/
 
Wie sal dan segghen dat hy een vileyn is?
2835
Oft hem beroemende vol van discoorde/
 
Daermen noyt onduecht af en hoorde?
 
Ghy vertribuleert u selven met rouwen/
 
Roepende hy is aen andere vrouwen/
 
Soo u jaloursheyt dies inspireert:
2840
Maer my dunct dat ghy u dies blameert.
 
Aenghesien dat ghy u selven wilt kinnen
 
Tpersoons ontschuldich int werc van minnen.
 
Tonghebonden voghelken dats mijn devijse/
 
Mach int bosch wel vlieghen van rijse te rijse/
2845
Alst sonder cluystere aen den voet is.
 
Hier mach hy op peynsen die wijs ende vroet is/
 
Vercoren nichte.
Kath.
 
Dat leg ick nedere:
 
Maer had ick mijn vlechte van hem wedere/
 
Soo liet ick hem vlieghen van tacke te tacke/
2850
Al sou ick sterven van onghemacke/
 
Midts hovaerdijen die my ter herten slaet.
Neve
 
Sijt te vreden ick weet ons raet.
Kath.
 
Wat raet?+
Neve
 
Hebt goeden moet.
Kath.
 
Soudy my raet weten? lacen ghy en doet:
2855
Beraet u selven/ ghy en cont my niet geraden.
Neve
 
Aenhoort mijn redene/ wat macht schaden?
 
Tis quaet datmen niet hooren en mach.
 
Hoort nichte/ ick soude sonder verdrach/
 
Met cloecken sinne hier op stocken// vry
2860
En trecken secretelijck daer hy getrocken// sy
 
Tot Dordrecht/ en cleeden my in mans habijte:
 
Ende vernemen die sake van mijnen profijte/
 
Wat hy bedrijft eert yemant wiste.
 
Const ghy dan by eenighen subtijlen liste
2865
Die vlechten ghecrijghen binnen den neste/
 
Soo waert al goet.
Kath.
 
Tware seker tbeste.
 
Mocht icker aen comen by eenighe saken/
 
Daer woude ic wel seven nachten om waken/
 
So en mocht ic van hem niet getrompeert// gaen:
2870
Maer indien die vlechten ghecasseert// staen
 
Inden gordele alsoomen ghewaecht
 
Dien hy daghelijcx om zijnen lijve draecht
 
Soo is die quaet te ghecrijghen dat noop ick
 
Voor allen dinghen.
Neve
 
Ten sal dat hoop ick:
2875
Ick meene wy sullen hem wel bestoppen
 
Van verre/ soo sal ick op thaesken cloppen:+
 
Ende halen hem uut op dat ick can/
 
Voor alle dinghen.
Kath.
 
Daer houdicx my an.
Neve
 
Dus wilt dan cloeckelijck nae u vermoghen/
2880
Die vaert aenvaerden.
Kath.
 
Willet mijn vader ghedoghen/
 
Therte sou te willigher ter aventueren staen.
Neve
 
Ick sal segghen dat wy pelgrimage gaen/ aant.
 
Tot Sint Andries: dus weest niet onverduldich.
Kath.
 
Daer ben ick een pelgrimage schuldich.
Neve
2885
Soo veel te betere/ gaen wy te gadere
 
Consent nu nemen aen uwen vadere/
 
Tot morghen vroech dat wijt bestaen sullen
 
Hoe dat wi te Dordrecht secreet nu gaen sullen.
Jal.
 
Wat segdy/ daer of?
Vree.
 
Nu gaense schoyen.
Jal.
2890
Laet loopen die carre
Vree.
 
Noyt beter proyen.
Jal.
 
Ick hebbe staen stoken.+
Vree.
 
En ick hebbe staen blasen.
Jal.
 
Haer poorte crevelt.
Vree.
 
Sy waent seg ick rasen.
Jal.
 
Sy sal haer gaen als een man vercleeden.
Vree.
 
Maer jaloursheyt sal zijn netken spreeden.
Jal.
2895
Ende vreese voor schande salt gordelken stelen.
Vree.
 
Ick salt haer raden al sou zijt bequelen.
Jal.
 
Dats een cleyn sake al zijnse verbolghen.
Vree.
 
Hoe maken wijt nu?
Jal.
 
Maer wy sullense gaen volghen.
Vree.
 
Naer dat die spijse is so moetmen tlooc// maken.
Jal.
2900
Wy sullen tpeper doen naer den rooc// smaken
 
Dus gaen wy/ ons blijschap is seer schaers
 
Wy maken ter werelt menich wanewaers.
Pausa.
Oom
 
Eylacen wacharmen noyt soo tonvreden/
 
Mijn ooghen tranen van jammerlieden/+
2905
Dat Dierick in siecheden dus moet verdwijnen.
 
Ick proeve alle meesters van medecijnen/
 
Om hem te heipene/ maer tis al niet.
 
Tot zijnen confoorte duer dit verdriet/
 
Soo heb ick hier eenen brief gheschreven/
2910
Die ick aen zijnen vader verheven
 
Seynden sal/ ten doocht niet ghelaten. aant.
 
Hoort hier mijn knecht/ het sal u baten/
 
Siet dat ghy my desen brief vast draecht.
Knecht
 
Waer sal icken draghen meester?
Oom
 
Dats wel ghevraecht/
2915
Aen Jan de hollandere die coopman mogende
 
Binnen Middelburch: rasch zijt u poghende
 
Ter bootschap/ sonder dies tontbeerne
 
Van dies ick u last gheve.
Knecht
 
Ick sal harde gheerne/
 
Die bootschap doen alsoot behoort:
2920
Adieu meester/ nu loop ick voort
 
Tschepewaert met jonstigher herten blije:
 
Soo ben ick daer morghen metten ghetije.
Dier. met zijn aensicht naer Middelburch sittende.
 
O Middelburch bequamelijck paradijs/
 
Propijs// van trooste/ wel soete stede:
2925
Van snede// bewaert daer mijn bloeyende rijs
 
In prijs// van eeren dit is mijn bede.
 
Vrede// is in u besloten mede/+
 
Dede// nature dan noyt haren loop/
 
So crijch ick duer tderven den besten coop.
2930
Mijn herte dat Venus cuerkens leert/
 
Keert// tot die ghene die my bemint.
 
Print// mijn herte in haerder herte gheeert:
 
Meert// Venus ons liefde die niet en hint.
 
Bint// herte aen therte daer ghy trouwe vint.
2935
Sint// ons ghestadicheyt dan te loone:
 
Want mijn bloet verandert in haer persoone.
 
Soo dat leeck volc naer den regene craeyt/
 
Spraeyt// therte zijn nette naer liefs accoort.
 
Voort// gaep ic naer den wint die daer draeyt.
2940
Waeyt// uut Middelburch dats mijn confoort
 
Woort// van trooste/ daer therte naer spoort.
 
Hoort// Venus mijn gracie waeyt altemale/
 
Tot Katherina soo twater loopt ten dale.
Begh.
 
Wat dats doch watte.
Dier.
2945
Het blust mijn pijne.
Begh.
 
Nu springt die catte
 
Naer tspeck inde schrijne.
Dier.
 
Tis mijnder siecheyt een medecijne/
 
Als ic taenscijn te Middelburch waert mach setten
2950
Noyt ghuere van roosen ofte violetten/
 
En mochten soo soet zijn als die lucht/
 
Die van daer comt: het is een hemelsce vrucht/
 
Daer alle corrupcien by ghenesen:+
 
Hy weet diet proeft.
Begh.
 
Tmach harde wel wesen/
2955
Al hebdy den roock vander spijsen heet/
 
Sy is u om eten seer onghereet:
 
Ghy slaet als die sotten doen nae haer scauwe
 
Arm wanewaersken.
Dier.
 
Dats my te nauwe/
 
Nochtans al ist met druck oft rauwe/
2960
Als ic die maechdelijcke vlechte aenschauwe/
 
Soo wordick los van allen versijcke.
 
Noyt gheen sanctinne in hemelrijcke/
 
En dede aen een mensche sulcken miracule:
 
Want soot venijn vliet vanden tyriakele/
2965
Doet my dese vlechte mijns lijdens derven.
 
Ick machse sdaechs cussen hondert werven/
 
Ende bestrijcken daer mede (ic moets vermanen)
 
Mijn aenschijn vloeyende vol heeter tranen:
 
My selven tot eender confortacie.
Begh.
2970
Soo en hoorde ick noyt van soeter collacie/
 
Men souder boecken af moghen schrijven.
 
Arm futselare wat muechdy bedrijven?
 
Naer uwe bederffenisse soo langt u.
 
Neemt liever een bast ende verhangt u/
2975
Soo sydy slevens quijte met allen.
Dier.
 
Wacharme waeromme?+
Begh.
 
Ghy sult seg ick vallen/
 
Vander carren/ ghi mochter u wel voor hoeden.
Dier.
 
Waer soudick vallen?
Begh.
 
In tgrief van armoeden.
Dier.
 
Begheerte van hoocheden/ die woorden clincken
2980
Ter herten lacen.
Begh.
 
Ghy soudt u verdrincken/
 
In schoon watere: en hebdy gheen ghevoelen?
 
Soudy verkiesen marasschen en poelen/
 
Dats u ende uwe vrienden blamelijck.
 
Weest hovaerdich het wordt u vramelijck.
2985
Climt op den roosboom/ u mach ghelucken
 
Dat ghi vanden hoochsten bome muecht plucken
 
Laet die slechte coolbloemen daerse staen/
 
Soo salmen u prijsen.
Dier.
 
Och sulck vermaen/ aant.
 
Begeerte van hoocheden/ hout my verkerelt.
Begh.
2990
Hier zijn de scoonste vrouwen vander werelt/
 
Die rijcxste/ die machtichste die in tlant// zijn.
 
Ey arm katijf dat sou uwen tant// zijn.
 
Wat soudy u worpen aen arme sleteren/
 
Het zijn die beste die hem verbeteren:
2995
Neemt dat voor ooghen ende anders niet
 
Oft tsal u berouwen.+
Dier.
 
Noyt sulck verdriet/
 
Soo tlammeken vliet// voor swolfs ghelaet/
 
Verdwijnt mijn juecht/ wee hem diet riet:
 
Dies men my siet// half desperaet.
3000
O begeerte van hoocheden quader dan quaet/
 
Verradelijck zaet// vol der blamacien/
 
Verhaert/ naeyt elders uwen naet/
 
Cort hier den draet// van tribulacien/
 
Nu moet ick met druckighe lamentacien/
3005
Te deser spacien// te bedde waert.
 
Want siecheyt my alle die leden beswaert.
De knecht comende tot Diericx vadere.
 
Ic en quam noyt so verre/ ic ben immers hier/
 
Och sate ick nu totten ooren toe int bier/
 
Soo stonde mijn hayr van vaer te crullene:
3010
Ick hope eer lanck mijnen buyck te vullene
 
Quame ick te Middelburch in de stadt.
 
Ick siese dies wordt mijn herte te badt/
 
Tis een lievelijck nat// datmen daer// drinct.
 
Ick wil te wijle dat my goet en claer// dinct
3015
Den brief dragen soot mijnen meester vermaende.
 
Ho/ Jan die Hollander die comt hier gaende/
 
Dies wil ick hem groeten het is wel noot.
 
Hy die voor ons sterf die bitter doot/
 
Aen thout des cruycen onverdient/
3020
Stercke u in duechden.
Vad.
 
Sijt willecome vrient/
 
Wats u begheeren/ maect my dat kinnelijck.+
Knecht
 
U broeder te Dordrecht gebiet hem minnelijc/
 
Tuwaert/ met desen brieve gheschreven:
 
Ende bidt u dat ghy hem antwoorde wilt geven/
3025
Van dat ghene dat hy u over schrijft.
Vad.
 
Gheerne bode siet dat ghy hier blijft/
 
Tot dat ick den brief hebbe overlesen.
Hy leest den brief.
 
Ey lacen God.
Moed.
 
Wat mach u wesen?
 
Segghet my mijn uutvercoren man.
Vad.
3030
My en is niet in trouwen.
Moed.
 
Waeromme versucht ghy dan/
 
Als die der vruecht is af ghespleten?
Vad.
 
Heere God wat vraechdy.
Moed.
 
En machmens niet weten/
 
Soo moetet ymmers harde quaet// zijn.
Vad.
 
Jaet: maer hier moet scherpen raet// zijn:
3035
Want Dierick daer onsen troost aen staet
 
Is soo sieck datmen hem weet gheenen raet
 
Te helpen: wat batet veel gheheelt.
Moed.
 
O God wat hoor ick.+
Vad.
 
Als eene die queelt
 
Werdt hy van leden onmachtich ende lam.
3040
Hy heeft noyt sint dat hy te Dordrecht quam
 
Eenighe ghesontheyt ghehadt noch vruecht
 
So luyt den brief: als hem elck verhuecht
 
Dan is zijn blij schap karmen en suchten.
Moed.
 
Tis al om die sletere/ dat soudick duchten
3045
Katherina/ dat hy dus carmt ende truert.
Vad.
 
Het mach ons wel leet zijn dat ons ditte gebuert/
 
Tclimt al ter hoocheyt dat wy bedreven hebben.
Moed.
 
Sy moet hem claerlic wat teten gegeven hebben/
 
Dat hy met siecheden dus is bevanghen.
Vad.
3050
Comt hy hier/ hy blijfter aen verhanghen/
 
Soo mijn sciencie tvermeten gheeft.
Moed.
 
Nu tot dat hijse bet vergheten heeft
 
Sullen wy hem laten te Dordrecht in stede.
Vad.
 
Tsal beteren hoop ick.
Moed.
 
Dat hoop ick mede/
3055
Want verscheyden liefde die mach wel coelen.
Vad.
 
Dat moghen sy weten diet ghevoelen/
 
Oft diet werc der reynder minnen obedieren.+
 
Segt mijnen broeder dat hi hem goedertieren
 
Wil wesen: alsoo wy hem betrouwen:
3060
Ende dat hi hem therte verhuecht wilt houwen/
 
Met schoonen vrouwen// alle den dach.
 
Soo dat hy die maecht vergheten mach/
 
Die hy te Middelburch heeft ghelaten.
Knecht
 
Ick salt gheerne doen.
Vad.
 
Het sal u oock baten/
3065
Eenen goeden tabbaert/ comt hier binnen.
 
God late den siecken confoort ghewinnen.

Conclusie.

Nat.
 
Gods vrienden en ist niet vreemde taenscouwen
 
Waer dattet minnende herte jolijt in smaect?
Jonst.
 
Die vlechten te cussene duer liefs betrouwen/
3070
Gods vrienden en ist niet vreemde taenscouwen?
Nat.
 
Ende wille met wille soo vast te houwen/
 
In liefs herte/ daer therte in blijft gheschaect.
Jonst.
 
Gods vrienden en ist niet vreemde taenscouwen/
 
Waer dattet minnende herte jolijt in smaect?
Nat.
3075
Dus bleef Dierick den jongelinc wel geraect/
 
In siecten verflout met crancken hope/
 
Als begheerte van hoocheden gaf de nope.+
Jonst.
 
Elck wachte hem wel van sulcken sope/
 
Dats te minnen/ dat hem niet worden en mach.
3080
Waert dat maer een dropelken op u drope/
 
Terstont soudy ghecrijghen den swaren slach/
 
En tlevende sterven voort ghelach.
Nat.
 
Gods vrienden alsoo ghy hebt ghehoort/
 
Soo track Katherina in mans habijte
3085
Te Dordrecht/ maer cleen was haer confoort:
 
Dies sy hem tgordel stal uut spijte.
 
Dit suldy hooren (leeft nu in jolijte)
 
In tvierde des spieghels der reender minnen.
 
Op een ander tijt sullen wy tvervolch beghinnen.
3090
Dus niemant en belghe hem te deser spatie.
 
Wy bevelen u alle Gods gratie.
Eynde vant derde spel.+

Prologhe vanden vierden spele.

Jonst.
 
God wil alle bedructe herten haer troost zijn.
Nat.
 
Hy bidt wel die voor hem selven bidt.
Jonst.
 
Tware vromelic den minnaers die gevoost1)zijn/
3095
God wil alle bedructe herten haer troost zijn.
Nat.
 
Ick hoore wel ghi sout ooc mede verloost zijn/
 
Vander qualen daer therte mede is besmit.
Jonst.
 
God die wil alle bedructe herten haer troost zijn.
Nat.
 
Hy bidt wel die voor hem selven bidt.
Jonst.
3100
Tis noodelijck ick en kenne swart noch wit/
 
Soo ben ick ten eynde der coorden gedreven/
 
Verdonckert inder minnen pit/
 
Buyten gracien mijns liefs beschreven/
 
Om dat Dierick die jonghelinck verheven/
3105
Sijnen dach versuimde uut siecten die crachtich is
 
So en wilse ter minnen accoort noch troost geven
 
Maer sy meent/ daer haer herte by clachtich is
 
Dat smans woort in trouwen logenachtich is.
Nat.
 
De ontschuldige moet dicwils tgelach betalen/
3110
Nochtans en weet hy niet hoet bier// smaect.+
 
En laet gheen onghenoechte in u dalen/
 
Also lange als Venus werck dangier// maect.
 
Al ist dat den troostighen rosier// naect
 
Met ontrooste en nemes voor geen vercleninge
3115
Tghetrouwe herte daer Venus vier// blaect/
 
Spreect dicwils verre van zijnder meeninge:
 
Maer bidt altoos om troosts verleeninghe/
 
Der liefster die therte mach verchieren:
 
Want vrouwen herten zijn goedertieren.
Jonst.
3120
Ick wil altijt naer uwen raet// doen
 
Ghy natuerlijck ghevoelen.
Nat.
 
Ghy en sult gheen quaet// doen
 
Met arbeydt crijchtmen vier uut den steene/
 
Wilt altijt met eeren naer dijnen staet// doen
 
In duechdelijcke conversacie reene.
3125
Draechtse liefde tot uwen persone alleene/
 
Sy sal verwonnen blijven ten hinde.
 
Ende beclaghen met bitteren weene/
 
Datse uwen jonste soo luttel bekinde.
Jonst.
 
Natuerlijck ghevoelen ick crijghe die smake/
3130
Als dat warachtich al u motijf was.
Nat.
 
Ghejonstich sin duersiet die sake
 
Van Katherina/ en merct wat haer bedrijf was:
 
Hoe cranck betrouwen daer int ghekijf was.
 
Sy heeft haer vercleet in mans habijte/
3135
Om therte twelck in tvergrammen stijf was+
 
Te bringhen tot vruechdelijcken jolijte.
 
Maer alle die saken vielen te onprofijte:
 
Dies moesten sy eeuwelijc daer omme quelen.
 
Doen ghinck sy bespueren/ ende al uut spijte
3140
Hoe sy hem tgordele souden moghen stelen.
 
Sijn bedectheyt ende zijn troostelick helen/
 
Die heeft Katherina in twerck bedroghen/
 
Soo ghy aenschouwen sult met den ooghen.
Jonst.
 
Ghy minnaers wilt hier jolijt in vaten/
3145
Dat altoos die sake goet versint is.
 
Tis sotheyt die zijn wercken wilt haten
 
Duer een woort twelcke hem onbekint is.
 
Merct hoe hertelijck dat dit ghemint is/
 
Daer Katherina ende Dierick haer veynsen.
3150
Wy gaen beghinnen wilt overpeynsen
 
Die soetheyt diemen u bewijsen sal:
 
Ick hope datter jolijt uut rijsen sal.

Die baniere vanden vierden spele.

 
Hier gaet Katherina in mans habijte
 
Met cleenen jolijte, te Dordrecht waert.
3155
Hoe sy Dierick tgordel stal van spijte,
 
Tzijnen onprofijte, twordt u verclaert.
 
Alle minnaers in amourueser aert
 
Worden beswaert, in zijn bequelen.
 
Twordt hier nu beter gheopenbaert
3160
Vrienden vermaert, comt hoort ons spelen
 
Hoe Katherina tgordel sal gaen stelen.+

Vorige Volgende