Album Joannis Rotarii (Johan Radermacher)

[fol. 121r]

[74. Baptista Mantuanus, Somnium Romanum, de verzen 137-162.]

Fata Dei consulta voco, non aetheris astra;
Quae quamvis aliquas habeant in corpore vires,
Cuncta tamen Dominum, Moderatoremque sequuntur,
Et nihil attentant, si non vidêre Tonantem
Assentiri ² operi, nutuque favere secundo.
Non secus ac validis harpe comprensa lacertis
Non aliò torquet, nisi quò manus egerit, ictum.
Tanta hominum generi impietas, tam noxia mens est
Ut coelo dent iura Dei, quasi cymba per undas
Sponte sua scopulos fugiat sine lege magistri,
Et quasi per campum volvat se biga patentem
Automedonteae gradiens sine verbere dextrae.

Praesidet ut summa vigilans in puppe magister

Ostenditque viam prorae: Sic solus ab altâ
Sede Deus tantae cursus et pondera molis
Temperat: ex primae motu vertiginis horae:
Ex horis nox atque dies; ex nocte dieque
Lunigenae surgunt menses; ex mensibus anni;
Lustra et Olympiades nemoris de nomine dictae:
Et quae centuplici volvuntur saecula cursu:
Chiliadesque cadunt: quarum iam quinta recessit,
Sexta citis vectata rotis per inane iugales
Ad medium iam cogit iter, mundique senectam
Ducit, et alterius vitae praenunciat ortum.
Hinc hominum Deus aetates, hinc tempora rerum
Hinc spatia, hinc vitas animantum et fata gubernat.

2 Lees: assentire.

[fol. 121v]

Ex mantuano DEI PROVIDENTIA

1 Mantuanus is bijnaam van Baptista Spagnuolo, Mantua 1447-1516.