Album Joannis Rotarii (Johan Radermacher)

[fol. 120v]

[73. Johan Radermacher sr, Epigram, lof van de arbeid.]

Epigramma de formicis.

Crede mihi nulla citius ratione moveri

Ad doctas artes culta iuventa potest:

Quam formicarum studio, duroque labore,

De quibus egregiè Flacce poëta notas.

Nam formica rapax hiemis non immemor atrae

Convehit ore suo quaeque calore potest:

Nec satis: adductam praedam superaddit acervo,

Quem struit, ingenti, bestia gnara sui.

Sed quis miretur, vel cui stupor occupet artus

Ob tot bestiolae provida facta ferae?

Agri hae cultores, hominesque fuêre sagaces

At nunc formicas reddidit ira Jovis.

Nam quosdam ritus has observare videmus,

vivendi certos et retinere modos.

Ad campos etiam contendunt agmine longo

Et patulae fagi scandere summa student.

Undique convectant fruges, antrisque recondunt,

Neve renascantur dulcia grana, secant.

Et sudant noctu, cum lucent sydera coelo,

Et cum nocturnos Luna gubernat equos

Ad quas rex Salomon vivendi quippe magistras

Argutis verbis iussit adire pigrum.

Utile formicis exemplum ut captet ab ipsis

Tempore quo poterit cautior esse brevi.

Hae siquidem quamvis opus haud rogantur ad ullum,

Nec ducis imperium, quod vereantur, habent:

Attamen insudant, durisque laboribus instant,

Ac epulas teneras quaslibet ore legunt.

Nec tolerare graves piget has aestate labores,

et longas toties ire, redire vias.

Ergò age, surge piger, somno quid tempora perdis,

tempora quae nullis sunt reparanda bonis.

[-Desidiam vitare, operamque impendere rebus

Scilicet haec praesens, fabula ritè docet.]

Joa. Raderm.

Disce bonas artes [-animo] igitur primaeva Iuventus.
Utilis humanis rebus ut esse queas. ¹

1 Deze laatste twee regels staan ernaast geschreven - in een andere (?) hand - en dienen vermoedelijk als vervanging van de doorgehaalde vss. 33-34