seit daer op soe die ghebode lichter te doen ende te houden sijn soe dien ghenen meer pijnen bereet wort diese niet en houden. Dus mach een yeghelijck wel proven want moghen wij dat cleyn ende dat licht niet doen hoe souden wij dan groete sware laste dragen van gheboden of van penitencien. Sonder twivel dat een minsche node doet ende mit onwille der hertten dat doet hij niet wel al waert oic goet dat hij dede dit sijn sinte augustijns worde.
Doch soe dunct mij op die correctie ende verbeteren mijnre doctoren. Hoe een minsche wel doet ende goet al ist teghen sijnen wille ende hij oec daer al strumende to gaet. Ten can ymmer niet quait wesen. want wt goet en can ymmer gheen quaet comen. Ick soude oic hopen alsoe een minsche bij wijlen quait doet bij beveel vanden gheenen die hij niet verhoeren en derre dat hij soe seer ymmer daer niet aen en misdoet als of hijt mit rechten wille dede. Die dient en is sijns selfs niet. Aldus iest bij wijlen wel ghevallen dat een ghehoersam ende onghehorsam was in eenre saken want besiet of hoerre twee sijn alse die here ende sijn balju. die heer ghebiet een sake te doen die bailju die onder den heer is ghebiet daer teghen te doen. Soe doen wij des oversten ghebot ende sijn hem ghehorich als wel betamelijc is. ende den bailju of die amptman sijn wij overhoerich dat en is gheen overhoericheit doechdelijc te verstaen.
Inder pelgrimaedse der luden van israel soe ghebuerdet dat sij quamen ende sloghen hoer tenten inden lande van moab. die coninc baal van moab seer duchtende voer dat volck van israel overmits dat sij bij der gracien gods allen der heydene lande wonnen daer omtreent. Ontboot hij ter stont den propheet balaam die oec heiden was ende beval hem dat hij dat volck van israel vermaledien soude op dat sij hem in sijnen lande niet en deerden. Balaam ghinck op eenen hogen berch daer hij allen dat volck oversach ende meendese te vermaledyen. daer die coninc baal bij stont soe quam god ende bevael hem dat hijse benedyen soude des die coninc doen seer tornich waer ende seide wat doestu ic beveel dij dese lude te vloken ende du benedijtse. Hij sprac en weetstu niet dat ic doen moet dat mij van boven bevoelen wort. Daen bevael hijt hem anderwerf noch worden hem sijn worden verkeert Derdewerf beval hijt hem mit eenen erren moede. balaam wart noch alsoe inghegeven dat hij dat heer van israel mit sconen worden ende prophetelijken hogher benediede dan hij voer ye ghedan hadde. des die coninc doen alte seer verbolghen wairt vraechde mit harden worden waer omme hij dat also gedaen hadde. Balaam seide du wilst dat volck gods vermaledijt hebben dat god ghebenedijt wil hebben. wes ghebod niemant voirgaen en mach. Doen hoerde die coninck wel hoe hij hadde ghevaren. mer balaam was onderdanich des oversten ghebode ende liet die gebode des conincs. Ende hij reet weder thuys op sijnen esel die onder weghen ghesproken hadde doen hij tot den coninc baal reet dat al hier te lanc wair te vertellen.
Cyrus die coninc van persen die oec een heiden was en dorst gode niet onghehorsam wesen ende seide. God vanden hiemel heeft mij bevoelen sijn huys te maken binnen jheruzalem. Nochtan was hij een heiden ende die meest alle die werelt aen gheen seide [l. sijde] des meers te regeren hadde. Ende gaf grote renten ende goeden totter tymmeringhen des tempels.
Saul die coninck als hij strijden soude bijden wille gods teghen die van amelech soe bevael hem god dat hier gheen te lijve laten en soude. Noch
Auteursrecht onbekend