heeft hij al sijn eer doen den buyck ghesteken. ende en scaempt hem gheenre scanden sijn sij groet of cleyn. Ende soe heeft hij wel te deel ghewest Want hij van allen ondoechden tsijn bejaecht hevet ende behouden. Hij is loghenachtich. hij is van onnutten worden. hij buldert. hij roemt hij is ondancbaer. hij is onhoesch. hij is bloede. hij is onsedich hij is carich hij is gulsich hij is boevich. hij is lodderachtich. hij sceldet hij vloect ende hij maect onrust. Want hij en ontsiet hem den scande niet die hem van eynighen vuylen saeken op comen mach of desmen van hem spreken mach. Dar om machmen die onscamelheit wel ghelijken bijden haye die een zeewolf geheiten is. Want sij soe onscamel so gulsich ende so vuyl van natueren is dat sij nummermeer versmaden en can. Ende al ist dat sijs niet meer inbrenghen en mach so bijt sij nochtan allen cleyn vischen die hoer teghen comen. Desgelijcs en machmen den onscamelen also vele niet doen dat hij hem ghenoeghen laet want hij is ondancbair. Ende ondancbairheit is een ondoecht die ic hate voer allen saken bij reden die ghij hier nae wel hoeren sult.
Ende sinte gregorius seit een prelaet die scandelijken dinghen doet die is alsoe menighen quaden doet werdich als hij sijnen ondersaten menighen exemplen vanden ewighen verliese doet. Noch seit hij dat niemant inder heiligher kirken meer scanden in doet dan die scandelijck leeft ende orden heeft op [l. of] naem van heilicheiden. Want hem en der niemant beriespen ende bij dien exempel so wart die sonde alte seer wt gherect ende breet ghemaect. Als die sondighe man om die werdicheit sijnre orden gheert wort.
Ysidorus seit die ghene die in sulken wijse bij ghebreke van leeren ende goeden exempel der goeder simpelre lude leven ende seeden ontreynen ende sondich maken die sijn boeser ende mesdadigher te gode ende ter werelt dan dieve ende roevers die dij lude scenden ende van horen goede beroven. Tis ommer meer godlijck ende eerlijc die winninghe of bate te ontbeeren die mit scanden vercregen wort. want waer scande is daer wert caritaet vermindert. Ende ware caritaet wort vermindert en can ich niet ghemerken wat ghewyn van salicheiden dat men daer hoepen mach.
Sinte augustijn seit. Die ghene die scandelijck leven ende an hem selven orlof nemen quaet te doen die soeken exempel an anderen die qualijc leven ende brenghen die mede in quaden gheruechte op dat sij ommer gheselscap ghevonden sullen hebben. Daer om soe vallet wel bij wijlen dat die ghescende minschen om hem selven inden scanden te lichten valsche sentencie gheven. Soe dat sij den boesen dicwijl doecht toe scrijven ende vervolghen den rechtverdighen mit hate ende mit nijde of sij pijnense hem mit loeghentael te scenden. want na voersproken worde soe is die onscamele altoes loghenachtich.
Oic seit hij is die onscamele altoes roemachtig ende roem is becant voer scandelijke ondoecht ende van alle minschen versmaet. Bij reden want hij sprect vele onnuttelijck ende beroemt hem bij wijlen van enen gulden appelboem. hij en verwerf nie vleederstruyck. Die van natueren roemers sijn die moeten spreken of bersten van worden sijn sij vol soe hem die gheest hars buycs dwinghet te spreken. Ende hem verlanghet altoes horende lude te hebben dien sij horen roem ende hoer ydelheit seggen moeghen. Het sijn vele roemers inder tijt die in groten onscamelen ende onnutten worden hem
Auteursrecht onbekend