Bouck der bloemen

Dies die xxxvste ende een goede bloem geheten Simpelheit.

Gherne woude ic wat godes seggen van rechter simpelheit dat hoer natuerlijck is want het is een alte scone bloem. Mer overmits dat sij seer ghelijc is der goedertierenheit ende ghedoechsamheit daer ic voer af ghesproken hebbe. Soe en bricht niet vele anders van haer te scriven dan een luttel daer ic hoer doecht mede wil vercieren ende voert setten ter eeren. wat mach soeter ende bequamer wesen dan onnosel simpelheit want daer en mach ymmer gheen quaet wt comen het en isser niet in. Elck vat gheeft wt datter in is ende dat daer niet in en is dat en canre niet wtcomen.

Eenvoldicheit dat is simpelheit in somighen duytsche ende onnoselheit dat is haer suster. ende sij en willen niet verscheiden wesen waer die eene is daer is die ander. Onnoselheit is in latijn gheheiten Innocencia dat is properlijc te seggen niet scadelijc. want wie onnosel is die en doet niemande scade noch en doet des niet om enich dinck hij soude hem niet daer konnen toe gheven yemande te bescadighen.

Dese soete bloem is te ghelijken bij den lamme dat is dat onnoselste dat simpelste ende onscadelijcste dier datmen vindet. Ende daer om soe ghelijc men den onnoselen jhesum des levende gods sone bijden lamme. Watmen hem doet en vertornt hem niet het gaet tot sijnre doot onnoselijc alsoe als ter weiden gaet ende wat beesten hem misdoen ten doot gheen were anders dan mitter stemmen claghende. Niet anders en doet die simpele onnosele die verdraghet al ende claget gode in sijnre herten swigende ende bydende in groter verduldicheit. Alsoe en hanteerde die gods soen oec gheen hardicheit teghen die ghene die hem pijnden ende doden Dan dat hij sijnen hiemelschen vader aenriep mit bitterheit sijns hertten ende jamerlijker stemmen.

Sinte augustijn seit. Onse abijt ende cledinghe en sal niet te overdraghende wesen of openbaerlijck wtnemende. Ende wij en sullen ons den

[p. 102]

luden niet te behaechlijc maken inder cleedinghe mer in goeden seden. Sonder wederstandicheit sullen wij oetmoedelijck lijden liever dan wij wter onnoselheit dwalen souden in haerdicheit der sonden.

Machabeus vrienden hadden liever te sterven in hoerre simpelheit dan sij ghestreden souden hebben op eenen vridach. ende meenden god alsoe te vertoernen ende dat sij daer aen sijn ghebot ghebroken souden hebben. Doe ezau jacob sijnen broder draighede doot te slaen doen hadde hijt wel ghebeert mitter hulpe sijns vaders. Mer neen hij ontsach hem gods ende woude oec sijnen ouderen broederen toe gheven enige herdicheit teghen hem aen te neemen ende vloe daer om van sijnen vader ysaac tot laban sijnen oom. Sinte johan baptista leet onnodelijc den doot om eenre vuylre vrouwen wil die soe simpel was dat hij niet ghecleet en was dan mit een huyt van eenen kemele. Daer aff seit sinte gregorius en hadde die simpelheit van slechter cledinghe gheen grote doecht gheweest sinte johan evangelist en souden soe vele niet af ghescreven gebben. Die van boven ghehoert wil wesen die sal hem neder boeghen ende die hoverdie af doen Op dat hij mit oetmodighen habijt die ontfermherticheit gods vercrighen moeghe. Want die hoverdie en wervet niet ende doet den luden gheen goet

Slechtheit der cledere is een teeken der reynre hertten want een lelic tabbart bewijst versmaedenisse der werelt. Doch soe isset betamelijc ende eerlijck dat een yeghelijc ghecleet sij nae sijnen state mer daer en salmen gheen hoverdie in hebben. Het sijn wael goede heren ende eerbaer lude gheweest die gheen costelijke of cierlijke ghewaden en droghen en dede sijs niet om den staet die hem toehoert ende datmen niet segghen en moechte dat sijt lieten van caricheiden daer die lude sondich mede werden soe dat sij daer gheen hoverdie in en hebben men moet der eeren ommer toegheven Een edel man die van goede ende van state is en sal ommer niet gaen als een haver coper noch die ackerman als een coepman. Als elc nae sijnen staet ende nae sijnen vermogen gaet dat mach wel op reden staen.

Die doecht ende simpelheit liet al inder herten ende inder ghedachten. Die menighe verheft hem meer in eenen rock van canafas dan menich goet man in eenen mantel van kammichate of damasche. Die heilighe lazarus was goet simpel ende rechtverdich ende gaf eenen yeghelijken tsijne ende leefde sijn daghen in doechdelijker simpelheit ende om sijnre overdragender onnoselheit ende doechde soe dede hem god die waerdicheit. dat hij en weder dede verrisen wt der erde doe hij iij. daghe doot gheweest hadde ende inder erden begraven.

Aldus hoertsu wel lieve vrient.
Wat men mit doechden heeft verdient.
Weest onnosel simpel ende goet.
Dat god dijn hulper wesen moet.