waerheit sal hem bijstandich sijn ende helpen hem wt allen noede. Ende soe wie van lieghen een ghewoente maect ende allen sijn dinghen sluyt op groete worde ende op logentale. Ghij sult vinden dat hij van gode een quaet ende verwachtende is.
David bat god altoes in groeter ernste. here sprac hij vrije ende hoede mijn siele van quaden lippen ende van valschen tonghen. Hij seit noch. heer geeft ordel over hem want sij mit haren tonghen boesheit ghedaen hebben. Soe wij mit waerheit voert gaet die en wortter niet mede ghemoet in hertte noch in sinnen. Mer die een loeghen verwen sal heeft altijt sorghe ende anxt in sijnre hertten hoe hijse best omme cleeden sal dat sij der waerheit moecht ghelijken. Wie hem saet teghen die warheit te dinghen te pleyten off te argueren hij sal daer om lanck qualijc mede varen. Als die twee oude papen die valsch waren dij die salige susanna mit boeser loghentale voerden ghedinghe brocht hadden ende woudense mit hoeren valschen tonghen ter doot brenghen. Omdat sij hen beiden niet te wil wesen en woude in overspele. also sijse verwacht hadden in haers selves boemgaert. Daer die reyne vrouwe bij daniel des propheten sentencie quyt af ghewijst waert. Ende die papen worden gheordelt al totten dooden ende worden ghesteynt nae hoerre wet.
Die mitter waerheit doer wilt hij heeft eenen vrien ganck ende ondect hem vrijlijc voer des richters poerte. ende die waerheit en soect gheen omme slaghe noch gheen winckel noch gheen hoeke. Sij wil altoes int licht wesen onversteken soe wil ic oec die goede mynnen inder waerheit. want god is den geenen die bij hem aenropen inder waerheit.
Die waerheit machmen ghelijken bijden partrijsen jongheren die oude pleghen elc anderen hoer jonghen te stelen ende op te voeden. Ende als dan die jonghen die ghestolen sijn die stemmen hoeren van hoeren ouderen soe laten sij die onrechte vlieghen ende comen weder tot haren gherechten ouderen inder waerheit. Die waerheit gaat boven allen doechden nae dat inder bibelen ghescreven staet.In ouden tijden lange voer cristus gheboerte soe was een groet machtich coninc die dij meeste op die tijt vander werelt was. Ende was gheheiten artaxertis off assuerus die was op een tijt nae middaghe in slape ghevallen. Ende die wile hij sliep overdrogen .iij. sijnre camerlinge wie sijnen heer dat beste ende redelijcste poent voertbracht als hij opstoende. Die souden vanden coninck thoechste verheven werden ende oec mit purpur ghecleet. ende souden wesen danderde naest den coninck. In godes name soe sette hem elc in sijnen studeren ende als die coninck opstont soe seiden sij hem haer overdrachte. Die coninck hoerdet gherne consenteerdet die .ij. vanden camerlinghen waren heiden. Mer die derde was een joede die daer inden lande van babilonien gheghijselt was mit sijnen ouderen.
Doe sprac die eerste heiden wijn is dat hoechste ende dat mechtichste dat men vint. Daer seide hij bij vele groter redenen die daer toe dienden. Die ander heiden prijsde den coninc ende seide daer bij vander groeter moeghentheit des conincs dat hij gheboet ende wederboet. hij dede slaen hij dede vangen. hij gheboet die heeren te trecken in aventueren hoers lijfs. Ende hadde dat gout ende dat goet vander werelt. bij hem soe ginghen allen dinghen wt mit vele meer ander worden. Die derde sprack ende dat was die
Auteursrecht onbekend