Vander viijder ende een snoede bloem geheiten. Wreetheit.
Ter stont als ic dese soete bloem van ontfermherticheit ghevonden hadde ende doe noch meer sochte. Soe vant ic daer eyn vuyle honts bloem die ic gherne overgeslaghen hadde mer die kerlle mitten corve seide ghij moet die een mitten anderen nemen. Soe dat icse wten corve nam ende als ichse wel besach soe waest wreetheid die der ontfermherticheit doot viant is. Daer mach ic wat af spreken van haerre natuerre op dat mense te bat scuwen moeghe ende vlien. Want sij en heeft niet goets in allen hoeren bladeren.
Dese vuyle honts bloem wreetheid ende onghenade mach men eens deels ghelijken bij een cruyt inder appoteeck dat heit azafetidi ende stinct datter niemant bij ghedueren en mach. Mer men machgher wat goets mede doen als die meester wil. alsoe machmen oeck mit wreetheit quade verjaghen als die voersten ende richters wel doen willen.
Die wreetheit is van vijf manieren. Deerste is een felheit nyemant te sparen. Die ander is niet te helpen den ghenen die hulp begheren. Die derde is niet te willen vergheven dat hem misdaen is. Die vierde is yemant swaer pijn aen te doen over mate of boven reden. Die vijfste is eene onghetemperde haesticheit yemant te misdoen boven sculde.
Vele leerrers scriven van wreetheid na horen sijnnen. cassiodorus seit het in een kenlijke wreetheit dat yemant beghert van eens anders sweit sijns ansichs rijc te werden. Nae mijnen synen soe is wreetheid een rechte bitterheit van hertten ghemenghet mit hoverdien ende mit nijt ende mit boesheit. Eenparlijck gheneghen mit felheid ende mit onghenaden het sij mit rechte off mit onrechte ic en weetse niet bat te scriven opt verbeteren mijnre doctoren. Men salse ghelijken bijden baseliscus dat heiten sommige lude een kokentrijs dat is die selfste ende venijnste beeste diemen vint. Die cruyde daer hij op adempt verderft die lucht worter aff gheinficeert ende mit slechten aensien doodet allen menschen ende creaturen. Dan alleen een cleyn dierken gheheiten een wessel dat wapent hem mit ruyten ende verbiedt. den baseliscum. Also is die goede minsche die wapent hem mit ontfermherticheit ende doedet die venijnde wreetheit. Sinte gregorius seit soe wanneer ghij eenen mensche mit goeder herten altoes gemint hebt. Ende ghij in uwer noet dien selven veel te wreder ende onghenadigher tegen u vint alst dicke ghesciet dat is tquaetste datmen ter werelt vint.
Die wreetheit is menigherhande het schijnt dat die meester wreet is als eenen rasende minsche bindet die vader schijnt wreet als hij sijnen soen slaet dat sij doch beide doen wt mynnen. Mer waert dat sijse niet en hanteerden die valsche lijdsamheit waer eene gherechte wreetheid. Want mit sulke sachtmoedicheit souden die ander verloeren bliven.
Vander selver wretheid lesen wij in ovidio van sijnen epistolen. hoe dat eens conincs dochter van colcos die seer scoen ende goetelijc was gheheeten medea. die so grote bermende [l. bernende] liefde geleedt hadde in jason conincs peleus doen van thesalien dat sij om te bat hoer ghenoechte te plegen haers vaders
Auteursrecht onbekend