Af-beeldinghe van d'eerste eeuwe der Societeyt Iesu
(1640)–Adriaen Poirters–
Auteursrechtvrij
[pagina 290]
| |||||
Ondervvijsinghe vande kinders.
EEn van ons ghebuer-mans soonen
VVouw my korts een nest gaen toonen:
'tVVas een boos en gauw ghedrocht,
'tHad den voghel langh ghesocht.
Desen nest was al sijn sorghen,
VVant hy ghingh daer alle morghen,
Hy wou weten dagh voor dagh
VVatter inden nest al lagh.
| |||||
[pagina 291]
| |||||
Als hy sagh die groote becken,
Doen ghingh hy sich wat vertrecken,
Hy sagh 't spel van verr' al aen,
En hoe't met den nest sou gaen.
Soo den nest begonst te vlugghen,
Datter pluymen op haer rugghen
VViessen, en oock op haer borst,
En het iongh nu vlieghen dorst;
Doen quam haer de moeder leeren
Het ghebruyck van dese veeren,
En sy toonde aen haer kindt
Hoe het snijden moest den windt:
Hoe het moest sijn streeck gaen houwen,
En het sonnen-licht aenschouwen,
Hoe den aerent noyt en daelt
Dan als hy sijn eten haelt.
Soo den ionghen dit quam segghen,
Ghingh ick hem den sin uytlegghen,
En ick sey: Dat ghy hier siet
Dat is dat v oock gheschiet.
Daer zijn oock die voor v vlieghen
Als ghy maer komt uyt v wieghen,
Die v leyden by der handt
Als ghy vlugh wordt in't verstandt.
Die wilt volghen, moet de noten,
Moet de knickers, moet de koten,
Die moet laeten 'tkinder-spel,
Om te vlieghen euen snel.
Siet de Compagnie verbeyden
Om de iongheyt aen te leyden,
VVant dat hiel een oudt verstandt
Datter iongh was in gheplant.
|
|