Af-beeldinghe van d'eerste eeuwe der Societeyt Iesu
(1640)–Adriaen Poirters–
Auteursrechtvrij
[pagina 100]
| |||||
ALs ghy hier dese keers siet ouervloedigh roocken,
Als ghy siet dat den dief haer oorsaeck is van smoocken,
En als ghy dan noch siet den snutter inde handt,
Ick bidd' v gaet dan noch wat verder met 't verstandt.
Terwijl de keers soo brandt, soo hanghen inde saelen,
En Keysers op een doeck en Princen afghemaelen,
Daer hanght den rijcken vreck versmoort in ouer daet,
En brast ghelijck een swijn, en slockt als eenen vraet.
| |||||
[pagina 101]
| |||||
Maer mits de kamer is nu téenemael in't duyster,
Men siet niet wie sy zijn, s'en hebben gheenen luyster,
Iae self het gouwe leér is van sijn glans berooft,
Om dat een doncker keers den schijn gheheel verdooft.
En eer ghy dit kondt sien den dief die dient ghesneden,
En wat ghy hebt ghesnut, dient met den voet ghetreden.
De keers, en een fraey man heeft ieder in't ghesicht,
VVie dat sich noyt en snut, is in sijn eyghen licht.
'tEn is niet eer ghenoegh dat aerd' gaet aerde lieuen,
VVie hier sich toe begheeft, die voedt sijn keers vol dieuen:
d'Armoede doch allen, al is't sy nu al quijt,
Sy houdt den meesten naem, spijt al de gheen die't spijt.
Daer was soo menigh Vorst daer ieder voor most buyghen,
Diogenes die lagh in reepen en in duyghen:
En siet hun naem en faem light in het selue graf,
En van den Philosooph spreeckt heel de wereldt af.
Al was Iob rijck in vee, al had hy menigh kemel,
d'Aermoede doch alleen verhief hem tot den hemel,
Noch was oyt soo bekent door kinders, vee oft schat,
Als doen hy vol van zeer op sijnen mest-hoop sat.
Den duyuel snutten hem, en gingh Iob heel ontblooten:
Iob kreegh een meerder schijn, en hy verbrandt sijn pooten:
En in het Oosten-landt, waer dat de son opgaet,
Daer sietmen dat nu Iob het tweede licht wel staet.
VVat baet dat menigh mensch magh goet op goet gaen eruen,
En leuen dickwils aerm, om rijck te moghen steruen?
Als d'uyt-vaert is ghedaen, en datmen niet meer luyt,
Dan is hun naem en faem, dat is hun fackel uyt.
Ghelooft het vry voorwaer, wie dat dit oyt sult lesen,
Dat ghy u hier besneedt, wat man soudt ghy niet wesen?
Stelt die eens onder v, en maeckt v hier wat quijt,
Hoe ghy hier meer betreedt, hoe dat ghy grooter zijt.
|
|
