Princeliicke deuiisen

CCXVII. Ingratis seruite nefas.

Onbillich ist, iae ramp (dat ick geen man can wenschen)
De dienen oft goet doen de vuyl' ondanckbaer' menschen.

Ondancbaer mensch, geen mensch, maer een onmenschlick beest,
Die Godt van hemelrijck vertoornigt aldermeest;

In boosheyt dunct ghij mij d'Adder-slang niet te wijcken,

Die ionck, heur moeder moort; volwassen, heurs ghelijcken.

[p. 463]

 

Ghij schend den genen die u vreucht en vriendtschap doet:

 

Dat meer is, ghij brengt om, die u lange heeft gevoedt.

 

Cicero mocht alsoo, soo mocht Pompeius clagen:

 

Want sij door uws gelijck volenden hunne dagen:

 

Socrates claegde noint, doch had oock clagens noot,

 

Die van sijn burgers oock gebrocht is totter doot;

 

Waerom? om dat hij heur de wijsheyt woude leeren;

 

En heur gewesen heeft den rechten wech van eeren.

 

Voorwaer, hoe meerder goet ghij sulcken volck bewijst,

 

Hoe heur ondancbaerheyt meer en meer wort gesplijst.

 

Het goet dat ghij heur doet, can hun maeg niet verdouwen:

 

Het wort vergift bij heur, dat sij weer op u spouwen.

Anders.

D'ondancbaer goet te doen, is deucht met ondeuchts vrucht:
Want dat wort meest gheloont met quaet en onghenucht.

MEn seydt voor een ghemeyn spreeckwoort, dat het vergift oft het quaet inden steert pleegt te schuylen. Daerom heb ik hier, voor de laetste van mijn Devijsen, tot onderwijs vande ondanckbaer menschen, willen stellen de Devijs vande Viper oft Adderslange: de welcke heur gaeyken het hooft afbijtende, ombringt, nae datse met hem versamelt zijnde heur genoechte van hem gehadt heeft: Maer nae datse ontfanghen hebbende, heur ionghen in heuren buyck ghedraghen ende ghevoedt heeft, soo wortse van de selve van ghelijcken oock ghedoodet: want sij bijten heurs moeders lichaem door, alsse ter werelt comen: Soo dat

[p. 464]

sij wel met goede reden, mitsgaders noch veel meer ander, seggen mach, heur selven over haer iongen beclagende, Ingratis seruite nefas: dat is, Het is onbillich den ondanckbaeren te dienen.

EYNDT der Princelijcke Devijsen oft VVapenen van Gabriel Simeon.