aensien, daer sij teghenwoordichlijcken in zijn, en maeckender gheen werck met allen van, oft sij met woorden oft metter daet een arm oft onmachtich mensch overtreden, ende eenigen trots, oft schimp aendoen: denckende dat den ghenen die sij onghelijck ghedaen hebben, mits dat hij als nu geen goet, gunst oft bijstandt van vrienden ende maghen en heeft, oock nimmermeer middel sal connen hebben, om hem selver te wreken, oft henlieden van gelijcken weder te doen: maer dat hij gehouden is, het leet dat hem geschied, seer haest te vergheten: Niettemin hoe seer dat dese tyrannen (met recht mogen sij met hunnen eyghen naem ghenoemt worden) bedroghen zijn door heur groote dwaesheyt ende onverstant, dat sal heur de gelegentheyt, ende den tijt ten laetsten noch wel doen bekennen. Doch eerstelijck wil ick heur vermaent ende gewaerschouwt hebben door de tegenwoordighe Devijs van eenen man, die neder geseten zijnde, in een marmer plat tafelken snijdt oft houdt tghene hem in de ghedachten noch steeckt, met dese bijgevoegde woorden, Scribit in marmore laesus: dat is, Die onghelijck geschiet is, schrijft sijn leet in eenen marmersteen.
Auteursrechtvrij
