Princeliicke deuiisen

CLXXV. Excidii turribus honor.

Tot eer van Torens breuck ick dese croon gewan:
Int climmen op den muer was ick den eersten man.

[p. 388]

 

Den eersten die met moet een vromicheyt bestaet,

 

Verdient den meesten loon des gantsche heyrcrachts daet:

 

Want elck is eerst beschroomt om iet voor te beginnen:

 

En die begint, die acht elck onbedacht van sinnen:

 

Maer alsmen siet dat hij de saeck wel heeft vollendt,

 

Dan wordt den blooden stout, en tot de deught sich wendt:

 

Daerom is hem met recht dees Toren-croon ghegheven,

 

Die eerst een stadt beclimt, en niet en spaert sijn leven.

DE Muer-croone, die van goudt gemaect was, in gedaente van canten oft careelen, als die van de stadts mueren, wierdt gegeven vanden Opper-veltheer, oft Keyser, aenden ghenen die eerst in't bestormen van een belegerde stadt der vijanden, boven op de mueren gheclommen was; sich selven in spijt ende teghen den danck ende macht der vijanden met lauter gewelt betrouwende oft begevende binnen haerlieder stadt.