Anders.
Veel eelder is de daet van een die can beschermen
Sijn vrienden in den noot; veel eelder ist erbermen;
Dan datmen vecht oft slaet, oft ander bringht ter doot;
Gelijck het beter is datm' iemant dect, dan bloodt.
Hoe grooten recht ghij hebt om iemant te bevechten,
Als ghij hem eersten crenct, u recht en mach niet hechten;
Met slaen vergaet het recht, iae gantschelijck verdwijnt:
Doet ghij de quade quaet, u goetheyt quaetheyt schijnt.
Hoe groot onrecht ghij hebt, comt iemant u bespringhen,
Het schijnt dat ghij met recht beschermt u eygen dinghen.
Al hebt ghij quaet verdient, het quaet dat u geschiet,
Maect dat ghij goet te zijn gelijct, al zijt gij 't niet.
DEn Capiteyn, Crijchs-overste oft Ridder die een belegering van eenighe stadt oft sterckte wederstaen hadde, wierdt gegeven de Croon van Belegering, oft beter Croon van Ontsett; anders Gras-croone ghenaemt: die hem vereert wierdt vande borgers die hij beschermt ende van haerlieder vijandt verlost had. Ende al ist dat dese Croon alleenlijck gemaect wierdt van Gars oft Gras, in Latijn Gramen (welc woort gemeynlijck genomen wierd voor allerley cruyden diemen plucken oft wtter aerden trecken mocht ter plaetsen daer de vijanden gelegert hadden, corst nae het vertreck der selver ende nae de verlossing der belegerde) soo isse nochtans, nae dat Plinius schrijft, de eerlickste van alle de Croonen geweest, ende de heerlicste, edelste ende waerdste om geacht te wesen.
Auteursrechtvrij
