Princeliicke deuiisen

[p. 356]

CLIX. Tolle voluptatum stimulos.

Neemt vvech oft worpt van u der lusten steeckelinghen,
Wilt ghij vrij en gerust u leven overbringhen.

Bedwingt, te wijl ghij meugt, u vleeschelicke lusten,
En laet oncuysch gewensch in u hert niet lang rusten:

Veriaegt die Vliegen haest, oft ghij wort gantsch besmert;

Verdrijftse heel in't eerst, soo ghij wil t blijven nett.

[p. 357]

 

Ghij moet dit vuyl gedrocht van u seer verr afwenden:

 

Soo niet, sij sullen u de spijs geheelijck schenden.

 

De Vlieghen groeyen haest, maer ondeught groeyt noch eer:

 

Comt u een ondeught bij, ghij crijgter haest veel meer.

GElijck als eenen Vlieghe-drijver oft Waeyer (selfs gemaeckt van Paeuweveiren, die van verre vertoonen de ghedaente van open ooghen) de Vlieghen ende dierghelijcke beestkens oft onghedierte vervaert maeckt, ende veriaegt: alsoo moeten wij, seydt Sinte Hieronymus, oock naerstelijck waeken, ende onse wtterste vlijticheyt doen, om van ons te verdrijven de wulpsche begeerlickheden, ende vleeschelicke lusten.