Princeliicke deuiisen

[p. 350]

CLVI. Caecus amor prolis.

De blinde liefde die ghij tot u kinders draegt,
Is veel eer haet, gemerckt ghij heur door weelde plaegt.

Veel diemen ouders noemt van heur onnoosel kinders,
En zijn geen ouders meer, maer eer hun eygen schinders.

Gelijck den Aep omhelst sijn iongen al soo stijf,

Dat hij heur doot de min het hert breect in heur lijf:

Alsoo doet ghij-lie oock: in stede van beminnen
Vernielt ghij u geslacht, bedervende all' heur sinnen:

[p. 351]

 

Gij geeft heur hunnen lust, en acht altijt voor goet

 

Al dat de wulpsche ieught door onbedachteyt doet.

 

Maer nu ghij heur verdraegt, als sij u goet vernielen,

 

Soo maect ghij dat sij u in't laetste self doen knielen:

 

Den ionghen Aep als-dan sijn ouders self vermoort,

 

Waerom? om dat sij hem niet straften als behoort.

DE Sim oft Aep bemint door heuren eygen aert heur ionghen soo seer, ende is daer soo sot mede, datse de selve inden arm nemende oft omhelsende, soo vast douwt, datse dickwijls versticken ende sterven. Alsoo doen oock menighe ouders, die op heur kinderen soo versnott zijn, iae verblint, ende heur soo veel toe laten nae heuren lust, datse in het laetste daer niet van en maken dat deugt.