Princeliicke deuiisen

[p. 338]

CL. Nodos virtute resoluo.

 

 

Ick weet van geen gecnoop, noch oock ontcnoop der semelen;
De cnoopen ick ontdoe met cracht, niet met lang femelen.

Had Alexander moet om groote wonder saken
Met cloeckheyt te bestaen, soo wast hem niet te laken,

Dat hij het futsel-werc t'ontcnoopen achte onwaert,

Maer sneed de vlechten door met sijn seer scherpe swaert.

[p. 339]

 

Heeft iemant oock het hert om nae cloeckmoedich dencken

 

Te keeren met sijn hant al dat ons can gecrencken,

 

Het waer hem schand te doen met list oft loosen raet

 

Tgeen hij volbrengen can met heldelicke daet.

MEt de Devijs van Mijn-heer den Maerschalck van Sinte Andries, de welcke is den arm ende het swaert van Alexander de Groot, in stucken snijdende oft houwende den niet-ontvlechtelicken cnoop oft strick van den wagen die in Gordien het oud Hof van Midas bewaert wiert: soudemen, nae mijn goetduncken moghen verstaen een sekere ende eygene middel ende behandicheyt die den voorseyden heer Mijnheer den Maerschalck heeft, om door sijn deucht ende vromicheyt eenige saecken seer licht ende doenlick te maken, die veel menschen seer swaer, moeyelick iae bijnae onmogelick souden schijnen te wesen.