Princeliicke deuiisen

[p. 328]

CXLVI. Improbitas subigit rectum.

De boosheyt vvorpt ter neer den goeden man oprecht.
Een die geen goet can doen, den goeden meest bevecht.

[p. 329]

 

Hoe nut waer desen boom, die ghij hier siet gheplant,

 

Waer hij daer maer alleen! doch laes, t'is schade en schand,

 

Den Veyl die hem verdruct met sijne taeye tacken,

 

Ducht ick, sal hem in't laetst noch heel ter aerden smacken.

 

Hoe menich vroom ghemoet door quaet ghesnor verleyt

 

Oock ondeucht pleghen moet, en van het weldoen scheydt!

 

Hoe dick versmoort het recht door caeckers overstemmen,

 

Soo dattet niet en can weerom aen't lant gheswemmen!

DEn Veyl, oft Clim-op, wassende bij eenigen rechten boom, bederft dien, ende treckt hem nederwaerts met sijn omvlechtinghen. Ende alsoo oock, ghelijckmen ghemeynlijck seydt, Le tort bien mené, peult rendre le droict inutile: dat is, Het onrecht, oft een quade sake wel beleyt, can het Recht, ende een goede sake lichtelijck doen beswijcken, oft onnut ende crachteloos worden.