Princeliicke deuiisen

[p. 276]

CXXI. Attendite vobis.

Het is een seker les: Elck is de wacht bevolen:
Siet voor u: let op als: Het quaet is meest verholen.

De schapen op het velt gaen iammerlijck verloren,
Tenzij een herder cloeck heur gaet en staet te voren:

[p. 277]

 

Den wolf en t'wilt gediert schend al de gantsche cud,

 

Ten zij des herders staf heur recht in tijts beschud:

 

Dan dit is cleyne schaey: maer laes wij arme schapen,

 

(Nu door tweedrachticheyt ons sielen-herders slapen,)

 

Ons menschelick geslacht, wort heel verzuymt op't velt,

 

En deerlijc t'onderbracht door Satans loos gewelt.

 

Daerom ô Christlic vee, bidt Godt dat hij ons send

 

Sulck' herders wiens vernuft den Vijant van u wend:

 

Oock Geestelicke schaer (ghij herders) wilt u vromen:

 

Siet voor u: waect ghij niet, de Turcksche wolven comen.

HEt soude voorwaer een seer groote ende ghewenschte nutticheyt wesen voor de rust ende vrede der Christen Kercken, dat de Geestelicke herders door het aenmercken (nemende die als voor een Devijs) der wereltsche schaepherders gereetschap, oock altijts naerstich waeren, ende waeckten om wel te doen dat sij schuldich zijn inde bediening van hun ampt ende beroep: als oock vermaent wort in het tiende Capittel der Wercken der Apostelen.