Dit toonden over lang Tarquinius van Roomen:
Hij smeet de cruyden neer die wiessen hooch als boomen;
En gaf sijn soon daer met te kennen sonder woort:
Siet dat ghij al de groot doe vluchten, oft vermoort.
TArquinius Superbus, dat is den Hoochmoedighen, oft Hoovaerdighen, Coninc van Roomen, (als Titus Livius, ende Valerius Maximus betuyghen) willende sijnen soon te kennen gheven sijn meeninghe opt ghene dat hij hem ontboden hadde, mits dat hij niemandt en betroude dat selve mondelingh te bevelen, leyde den edelman, die aen hem van sijnen soon ghesonden was, in sijnen hof, ende gaende over en weder wandelen, begost al de grootste coppen oft saet-bollen van het Heul-cruyt met een cleyn stocksken af te smijten: als oft hij daer mede sijnen soone hadde willen laten weten, dat sijn believen was, dat hij de grootste ende machtichste mannen onder de inwoonders der stadt Gabii (daer de vraghe af was, ende bij de welcke sijnen soon sich selven in grooten aensien ende vermoghen ghebrocht hadde, door eenen wonderlicken loosen treck) soude doen onthalsen oft aenden lijve straffen. Aldus met dese bedeckte ende twijffelachtighe daet, gaf hij sijnen soon dese bloedige antwoort te verstaen: Voor ooghen nemende (is wel te vermoeden) dat een Prins oft Vorst, om sijn lant in brede te stellen, alle de groote ondersaten hem onderdanich ende ghehoorsaem behoort te maecken.
Auteursrechtvrij
