Princeliicke deuiisen

[p. 193]

LXXXIII. Euertit & aequat.

Die wel ghebieden wil, laet niemant sich verheffen:
De quade stoot hij om, en maectet alom effen.

Den lantman strijct en breect, en maect de moten effen,
Wanneer hij iet aenmerckt sich wat te seer verheffen:

Den Prins sal oock, soo wie iet roert, begint, oft muyt,

Eer hij noch verder comt, verbien, oft roeyen wt.

Voorwaer die rust en vrede in al sijn lant wil houwen,
Moet nimmermeer sijn sorg en ijver laten couwen:

[p. 194]

 

Maer moet ghedurichlick de quade tegen gaen,

 

Die om heur eyghen baet seer haest wat nieuws bestaen.

VVIlhem van Henegauw, Grave van Oostervant, oudsten soon van Hertog Aelbrecht van Beyeren, Grave van Henegauw, Hollant ende Zeelant, voerde in't iaer 1390 voor sijn Devijs een Egge van gout ghemaect in sijnen standaert: den welken opengedaen wiert in het crijchsheir der Christenen teghen de Sarasijnen voor de stadt van Afrijken in Barbarijen. Ende hier mede wiert te kennen ghegheven, dat ghelijck de Egge omworpt ende effen maeckt de hovelkens ende hooge hoopkens van een velt oft acker: also can oock een goet ende wijs Prins in sijn lant door goede wetten, instellinghen oft ordonancien wtroepen ende te niet doen de quade oproerige menschen, die heur selven al quaetdoende boven de ander soecken te verheffen ende, wtmunten, teghen sijn autoriteyt oft ontsichelickheyt ende macht.