Princeliicke deuiisen

[p. 156]

LXV. Pressa est insignis gloria facti.

Den lof en eer van een seer fraeye vrome daet
VVort dick verdruct door nijt, en oock seer dick door haet.

Hoe wel een vrome daer seer dickwijls qualijc luct,
Mits dat des werelts macht de deucht eensdeels verdruct:

[p. 157]

 

Nochtans als tgroot ghewelt vergaet in lange tijden,

 

Dan moet den quaden self het goet voor goet belijden.

 

Cost Iuliani macht Ioannis cloecke daet

 

Bij tblinde heydens volc doen houden voor seer quaet,

 

Nochtans en heeft sij hem soo seer niet connen dwinghen

 

Dat hij iet tegen Godt oft sijn eer liet volbringen.

 

En soo heeft Christi kerck, door zegening van Godt,

 

Verwonnen al den spijt van't Keyserlick ghebodt.

ALs den Keyser Iuliaen, den Apostaet (dat is Verlaeter, oft Verloochenaer des Kersten geloofs) soo de Kerckelike Historien vermellen, dede binnen de stadt van Nicomedien wtroepen ende openbaerlijken vercondighen een streng verbodt, waer mede de Kerstenen alle Scholen, ende oock alle bedieninghen van ghemeyne ampten ende officien verboden wierden: soo isset gebeurt, dat den heyligen man Sint Ian den Martelaer (daer het boeck der Martelaren van vermelt) dat gebodt in sijn handen vattende, het selve van een ghescheurt ende ghebroken heeft in de volle vergadering van de gantsche ghemeynte aldaer: Want hij merckte dattet een sake was die het Kersten gheloof veel schadelicker soude wesen, dan alle ander soorten van wreede straffen ende tormenten diemen de Christenen soude connen aendoen. Aldus met de daet van desen heylighen man wort ons te kennen ghegheven datter gheen vreese oft menschelick ontsich en is, het welcke de conscientie ende ons inwendich ghevoelen, aengende het gheloof, eenichsins behoorden te connen verslaen, doen verflauwen, veranderen oft weyffelen.