Princelijcke deuijsen

[fol. 23v]

Fortitudo eius Rhodum tenuit.

Die oerden vanden Bootschap int paeyselijck huys van Sauoyen heeft inghestelt gheweest, vanden Groenen Graue ghenaemt Ame, de vijfste van dien name.

[fol. 24r]

De welcke voor wapen oft Deuijse van deser oerden, heeft gheordineert eenen gouden Halsbant van vier letters, met minne stricken gheulochten, daer onder was aenhangende een gouden beeldt vander Bootschap vande Maeghet Maria. Dese vier letters beteekenen die vier bouen ghestelde woorden, ende dat om in eeuwigher memorien te houden int huys van Sauoyen die groote vromicheyt ende ridderlijcke daden vanden vromen Heere Ame die eerste Graue van Sauoyen: de welcke treckende ouer zee teghen die ongheloouighe, dede voor Acre die vander oerden van Rhodes, daer hy bedienende was het officie van tgroot Meesterschap, soo grooten dienst, dat sy op hem versochten, dat hy ende sijne naecomelinghen, Hertogen van Sauoyen souden willen voeren de wapen van deser oerden, tot ghedinckenisse dat hy beschermt ende bewaert hadde die voorseyde Ridders, ende ghetrocken wten perijckele vande wreetheyt der heydenen ende vianden vanden Christen ghelooue. Aldus de voorseyde Groene Graue fondateur vande voorghenoemder oerden heeft hem seluen ghestelt het hooft ende opperste van dien, ende tot hem ghecoren noch xiiij. edele Ridders, hy sijnde de vijfthienste, ende yegelijck van dien gegeuen eenen gouden hals-

[fol. 24v]

bant met die voorseyde Deuijse. Vande welcke eerste ridders tot een ghedinckenisse de namen hier onder ghestelt sijn.

De groene Graue hooft ende opperste vander oerden.

Ame Graue van Geneuen.

Anthonis Heere van Beaujeu.

Hugo van Chalon, Heere van Arlay.

Ame van Geneuen.

Ian van Vianen Amirael van Vranckrijck.

Willem van Grandzon.

Willem van Calamon.

Roelant van Veyssy Bourbonnois.

Steuen Bastaert vander Baumen.

Iaspar van Monmeur.

Baerte van Foras.

Thennart van Menchon.

Ame Bonnaert.

Ritsart Musart Enghelsman.