Prozawerken in Maastrichtsch dialect

Boomvruchten (vervolg).

Et deit ene mins al good es me umstreeks Juni de wiever op straot huurt roope: ‘alloh! vief sent 'n haaf pond keerse!’ (alloh’ moot altied tebij). Dan zèGGe de lui al tegenein: de goojen tied van et fruit kump weer aon. E bitsje later steit te Merret vol körref mèt blankètte, roej en broun welse, spaonse en zwarte keerse en dan bakke veer keersekook. Eederein haolt z'n hart op aon hun sappig vleis. Zellefs te kinder knawele de verrekeskeerskes nog op en goon later de keersestein zeuke um in de ‘Roezekrans’ te verkoupe, boe ze geregeld mèt hun keersestein de deur oet weurde gelits. D'n eine maakde d'n andere wies, totse ze kochte bij

[p. 109]

de aptiekers, zonder erreg, tot tat neet mét te handvol gebäörde. Es ze dan hun hemfelke aonbooje in de hoop, et kapitaol van eine sent teveur te kriege, en ze woorte stèllekes pisse gesjik mèt hun keersestein, dan waor dat ene gansen tegeslaag. Mer ze truuzde ziech gaw, zatte ziech op e kubbelke op ene stóp bijein en begóste et ein of ander späölke, wie ‘sjäölke’ mèt et naomaak-gebedsje:

Appele, pere, priesters, proeme,
Bizze-bizze-bame,
De kat zal krame,
D'n hond zal spinne,
Bruudsje te winne,
Hamelsblok, Pietersklok,
Slók alles op en d'n dèksel d'rop.

Joog te maog hun dan weer van de stóp aof, dan reepe ze: ‘lieleke aw kalbas!’