¶ Van eenen anderen die schult oft cause van der misdaet op te legghene.
HEt mach gebueren dat den verweerdere een fayt kent, ende aenneemt als quaet in hem seluen, maer dat hi om hem te defenderen eenen anderen dye schult oft cause te laste legt. Exempel. Een man heeft een schoon ionghe dochtere het geduert op eenen tijt late inden auont, hy vint een ionc gheselle sprekende met zijnder dochter in een heymelike plaetse alleene. Die vader presumerende dat si daer om quaet doen versaemt waren, hi heeft den ioncman haestelijck duersteken. Dye vader vanden ioncman accuseert hem voort recht. Den heesch es, Ghi hebt den ionckman vermoort. Hi kent het fayt, segghende, tes zijn cause ende schult, hi heeft mijn dochter gheuioleert. Hier moet geconsidereert wesen, oft den verweerder wel doet, dat hi die cause ende schult van zijnder misdaet, den anderen te laste legt. Voort oft dye misdaet vanden anderen soo groot es, als het fayt dat den verweerdere aenneemt, ende kent ghedaen te hebbene. En oft hem gheoorloft was quaet te doene, als waert sake dat een ander quaet ghedaen hadde, voort oft die misdaet vanden anderen nyet eerst hadde moeten blijcken. Ende aenghesien dat dye sake, noch voor iustitien nyet ghecomen en was oft hi niet eerst behoorlijcke hadde moeten ghecondamneert wesen, eer hy soude ghepunierdt wesen.
Auteursrechtvrij