Rhetorica, dye edele const van welsegghene

¶ Een ander exempel.

EEn Capiteyn es gestelt vanden prince om een frontiere des lants te bewarene. Die vianden arrijueren, den Capiteyn schrijft aen den Gouuernuer des lants om assistentie, daer en coemt gheen assistentie, die Capiteyn laet een fortresse innemen, midts dat hi gheen debuoiren doet om die te beschermen. Hi wort gheaccuseert voor den Prince. Hi excuseert hem bi datter gheen succours ghesonden en was. Hier moet

[fol. 38r]

geconsidereert wesen, oft in die macht vanden Gouuernuer was, tgheene dat hem den verweerder te laste legt. Ende bi wat middelen hi tselue hadde moghen doen, behoudens die eere ende weluaren vanden Prince ende vanden ghemeenen lande. En al waert sake dat hi al tselue wel ende eerlijc hadde moghen doen, of daerom den verweerder gheexcuseert werdt, daer hi selue zijn debuoir niet wel ghedaen en heeft. Voort salmen alle manieren van coniecturen ghebruycken, om te wetenene of hi dit wt quader meeninge, met voorrade ghedaen mach hebben, also vooren in die cause coniecturael gheleert es.