Den boeck der gheestelijcke sanghen
(1631)–Lucas van Mechelen–
Auteursrechtvrij
[pagina 327]
| |
BASSVS.  | |
[pagina 328]
| |
ALleluia! alleluia! Vriendinne,
Hoort hoe dat voorts die gheluckighe siel'
Quam in't Paleys van die verheven minne,
Daer haer den Heer' in hem verwesent hiel:
Hoort wat gheluck dat sy ontfinck,
Daer sy in't huys der Minnen ghinck.
Dat eeuwich goedt dat quam haer innich teghen
Ontsteken heel als eene clare vlam'
Met vreughden bly', met alder weelden seghen,
En gansch in hem haer uyt haer selven nam:
Dat eeuwich goedt, dat salich Een
En liet in haer beletsel gheen.
Het nam haer me', o overblijde reyse,
Die sy uyt haer in haren Schepper de';
Mijn hert' ontfonckt, soo dickwils als ick peyse
Het groot gheluck van haer ghewenschte ste,
Het groot gheluck van dien dach,
Dat sy t'Paleys der minnen sach.
Sy quam daer in ghelijck uyt haer ghetoghen,
In haer en scheen' gheen leven meer te zijn,
| |
[pagina 329]
| |
T'scheen' dat sy was haer selven heel ontvloghen,
T'scheen' dat sy stondt gheheel in een verdwijn:
Godts liefde die haer inne liet,
De' haer in dat Paleys te niet.
Dat vrolijck hof, dat huys der hooghster welde
Was eenen troost, was een eeuwich vermaeck,
Daer Godt die siel' heel uyt haer selven stelde,
En overgoot met Goddelijcken smaeck:
T'gheluck, t'gheniet t'ghewenscht' pleysier
De' die bly' siel' Godt worden, schier.
Een salicheydt soo hoogh' boven ghedachten
Was dat ghebruyck, was die hemelsche feest',
Die daer opghinck in haerder sielen crachten,
Die daer ontspronck in haren blijden gheest;
Dat sy in Godt door liefde pur
Heel scheen verandert van natur'.
Hadd' Godts vriendinn', hadd' die siel' uytghelesen
Aensien gheweest met een ghesichte claer,
Men hadd' gheseydt haer Goddelijck te wesen,
Soo seer was sy dat hooghste wesen naer:
In haren Godt, daer sy verdween,
Gheen mensch', door claerheydt meer en scheen.
O duysentmael van haren Godt vercoren!
M'en sach haer niet soo sy in Gode stondt;
In haren Godt was sy gheheel verloren,
Daer sy alleen haer salich inne vondt:
Al scheen sy hier en daer te staen,
Sy was gheheel in Godt ghegaen.
|
|
