Den boeck der gheestelijcke sanghen

[p. 58]

Die Innighe: Vertelt hoe die Salighe haer daghelijcks in Godt oeffende, hoe sy haer hadd' wacker wordende.

Op de Wijse: Berine vous serez malade.

SVPERIOR.

BASSVS.

[p. 59]

HOort hoe dat stont in trouw' bysonder

Die Salighe, die overwonder,

Die altijt daer sy lach, dry' urkens voor den dach

Soo hare ooghen open ghinghen,

Stracks was met haer gepeys, recht in Godt t'elcke reys'.

Gheen rust' en socht' sy der naturen,

S'en maeckte daer gheen langhe uren;

Met t'herte opgherecht, aen d'eeuwich goet ghehecht.

Soo hare etc.

S' en keerde om' noch wederomme,

Elders socht' sy den Bruydegomme;

Sy spronck ten bedden uyt, sy vondt hem met de Bruyt.

Soo hare etc.

Niet langh' en wou' sy fantaseren,

Sy wist' wat dat sy moest' begheren;

In die doodt Christi stondt verwesen haren gront:

Soo hare etc.

Het eerste dat sy bly opsette,

Dat sy voor nam, daer sy op lette,

Was haren Liefsten bloot, te volghen in de doodt.

Soo hare etc.