Cloosterken der gheestelijcke verryssenisse ofte der ontwordentheyt
(1639)–Lucas van Mechelen–
Auteursrechtvrij
[pagina 87]
| |
Wijse: Den Enghel van boven. Oft: T’is hemelsche weelde. Req. 207.Vw’ woorden verheven
Zijn gheest ende leven
Moecht ick u volghen naer
Recht tot dat wesen klaer
Moecht ick met u die baen
Recht inne gaen,
Om tot dat Cloosterken vol vreught
Te komen door Godts gheest verheught.
Te smaken Godts minne
Ick hier nu beghinne
Die mijnen gheest ontsteeckt,
Als ghy my van haer spreeckt:
Vw’ woorden over-soet
Van’t innigh goet,
Tot t’Cloosterken Godts over-bly
Vol vrolijckheydt verwecken my.
Dat innighste Wesen
Hebt ghy my ghepresen,
Ghy hebt mijn ziel gheraeckt,
Mijn hert naer d’Wesen haeckt,
O soeten inne-keer
Tot Godt den Heer,
| |
[pagina 88]
| |
Daer Godt dat Cloosterken vertoont
Daer t’hert in’t hooghste wesen woont.
Gheluckigh ghesichte
In’t opperste lichte
Dat op-ghetoghen staet
Daer die klaer Son op-gaet
Die alle blijschap werckt
Als t’hert aenmerckt
In t’Cloosterken dat soet gheniet
Daer’t alle weelden inne siet.
Wel vrolijck verslonden
In’t got der af-gronden
In’t licht van Godts aenschijn
Moest ghy reyn ziele zijn
Daer siet staen en kost noyt
En staen verstroyt
Daer ghy in t’Cloosterken gheleydt
Van allen onrust stondt ghescheydt
My stellen voor ooghen
My breeder vertooghen
Wilt, hoe datmen ghemeyn
Ghehoorsaem, Arm, en Reyn
Moet gaen den rechten pat
Tot dien schat
Diemen in t’Cloosterken ghebruyckt
Daer haer de rijckheydt Godts ontluyckt
Ick bid’u dees bede
Voldoet my hier mede,
Op dien wegh my set,
Daer ick sonder belet
| |
[pagina 89]
| |
Ten eynde sekerlijck
Godts innigh rijck,
Godts Cloosterken vry en gherust
Mach in-gaen naer mijns herten lust.
|
|