Van Pasiphaë.
Pasiphaë was dochter van de Sonne en Perseïs, en Huysvrouwe van Minos, ghelijck wy in't voorgaende Boeck hebben verhaelt, hadde Neptunus om Minos t'offeren gheschickt eenen seer schoonen witten Stier, die Minos behiel, niet voldoende zijn beloft: waerom Neptunus tot wrake te weghe bracht, dat Pasiphaë heel op desen Stier verliefde. Dit dede de Goddinne Venus, die altijt vergramt was op de Sonne, om datse haer overspel met Mars hadde gheopenbaert: en daerom dede sy aen der Sonnen kinderen te spijt, al t'leedt dat sy mochte. Daedalus om Pasiphaë in haer rasende liefde te baet te comen, maeckte haer seer constigh een houten Koe, daer sy dan in croop, om des Stiers geselschap te hebben: ander seggen, een houten huysken, daer sy heymelijck met haren lieven Stier in dede na haren wille. Het welck namaels Minos te weten comende, werdt Daedalus met zijnen soon Icaro voor eeuwich gevangen gestelt in den Dool-hof, die hy self seer uytnemende hadde gebouwt. Laet ons nu een weynich verhalen van Daedalus, en gedencken dan weder Pasiphaë.
Auteursrechtelijk beschermd