Het schilder-boeck

Van Europa.

Aengaende de Fabel van Europa, die is (soo Eusebius schrijft) half gheschiedenis,^* segghende, dat Asterius Coningh van Creta, wesende verlieft op Europa, de Dochter van Agenor, Coningh van Phenicien, schickte eenen zijnen ghetrouwen Dienaer met een seer schoon Schip, gheheeten den Stier, om datter den Stier op gheschildert was. Desen daer ghecomen, bracht behendich soo veel te weghe, dat dese schoon Dochter quam op den Stier, te weten, het Schip, om dat te besien. Soo haest sy op't Schip was, de Schiplieden, soo hun te vooren gheboden was, gaven riemen den water, en seylen den winde, en brochtense ontschaeckt wesende in Creta tot hunnen Coningh, welcken aen haer wan Minos, en zijn broeders. Dese Europa was seer gheluckigh, dat door haer Naems gherucht het derde deel der Weerelts naem werdt ghegheven. Herodotus in't eerste Boeck zijner gheschiedenissen, seght oock op de voorgaende wijse, en dat soo een Schip quam tot Tyro in Phenicien, met datter volght. Voort seght Natalis Comes, dat Europa van Iuppiter vercreegh als boven, dat nae haer t'derde deel der Weerelt soude zijn geheeten: doch en seght hier van niet bysonders tot stichtinghe oft leeringhe, dan hy veel van de cracht, en onghevallen, oft schaden der Liefden verhaelt. Maer Caelius Aug. Curio in zijn eerste Boeck, vervolgende de Hieroglyphicken,^* seght, dat Europa gheseten op den Stier, wesende ghevoert op de Zee, hebbende t'aensicht omghekeert nae den oever oft t'landt, beteeckent de Siele des Menschen, de welcke van het lichaem wordt ghevoert door de sorghlijcke Zee deser Weerelt: en sy siet evenwel van verre met grooter ernst nae den oever daer sy van ghecomen is, dat is, nae haren Schepper Godt. Dese Zee is van den circkel der Sielen, en beweginghe des redens, wanneer de Siele haer vertreckt van de Godtlijcke dinghen, om te aenmercken de dinghen oft handelinghen der Menschen, en keert dan weder ten lesten in haren eersten staet, om Godt aendachtich t'aenschouwen, ghelijck Plato ghetuyght. Daerom versierden de Poeten, dat Iuppiter onder des Stiers ghedaente ontschaeckte Europam, dochter van Agenor, Coningh van Phenicien, en voerdese door de Zee in Creten.

Eyndt des tweeden Boecks.

* Fabel van Europa, waer op ghebouwt.

* VVtlegh op Europa.