Het schilder-boeck

Van Mycon, Schilder van Athenen.

In't leven van den lesten Polygnoto, hebben wy aenghetrocken den naem van desen Mycon van Athenen, hoe dat hy zijn constighe wercken van den Atheners wel hooghlijck liet betalen, waer uyt wel te verstaen is, dat hy een uytnemende Meester doe ter tijdt is gheweest. Hy heeft oock ghebruyckt het swart van druyf-kernen, oft ghebrande wijn-droessem, datmen doe hiet Tryginon, en oock wel d'eerste die den Atheenschen Oker ghebruyckte. Hy was seer constich in te maken die verscheyden actien der worstelaers, en hadde groote genuechte die aerdich in zijn wercken uyt te beelden, hy was geheeten den grooten Mycon. Daer is eenen anderen Mycon gheweest, die hietmen den^* jongen, welcken hadde een dochter, die oock seer constigh was in de Schilderconst. Nu Mycon den grooten, die wy nu voor hebben, schilderde een seer heerlijck stuck, van den Lapithen en Centauren, dat t'Athenen in Theseus Tempel worde ghestelt: Noch een ander van den Argonauten, die de vaert nae Colchis deden, dit werdt t'Athenen ghestelt in den Tempel van Castor. Noch maeckte hy een stuck, daer die van Athenen onder Theseus den Amasones bestreden: Een ander, daer de Griecken Troyen verdorven, en daer de Coningen raedt houden over t'leelijck stuck, dat Ajax dede, Cassandra Priami dochter te hebben onteert in den Tempel van de Goddinne Minerva. Hy hadde oock ghemaeckt eenen hoop Iongvrouwen, die gevangen geleydt waren: oock een Cassandra: oock de bataillie tot Marathon teghen den Persen, daer men in beyde partijen sagh eenen lust die sy hadden malcander te treffen, oock sagh men ter ander sijden de Persen verbaestlijck vluchten, en loopen onbedacht in een groot maras. Hy maeckte oock de Vlote van Phenicen, de nederlaghe der Barbaren door de Griecken, en Theseus, die t'seyl gaet: oock een Minerve, en Hercules. Wanneer hy gheweest is, en heb ick niet ghevonden. Hy had eenen soon Onaras, een Beeldtsnijder, den besten die uyt Dedalus winckel is voortgecomen. Hy hadde van die van Phigalien voor een Ceres ses duysent Croonen. Desen soon leefde in de 83^e. Olympiade, waer by men mach ramen wanneer den Vader leefde.

* Van twee Mycons, den ouden en den jongen.