Dat hooghe liedt Salomo, met noch andere gheestelycke liedekens
(1595)–Karel van Mander–
Auteursrechtvrij
[pagina 82]
| |
O Christi Kercke soet,
Wilt u verjubileren,
Hebt goeden moet,
Al wilt men u persequeren,
Al is groot uwer vyanden ghetal,
V Capiteyn domineert boven hen al,
Hy sal wel obtineren,
End' brenghen u vyanden in den val,
Al maken sy nu soo groot gheschal,
Sy moeten reculeren.
O Lelie die in de doornen staet,
En wilt u niet vertsaghen,
Al zijn die doornen quaet,
En wilter niet nae vraghen,
Al en doen u de Menschen gheen onderstandt,
V Coninck draeght sorgh, aen elcken cant,
Voor al die u belaghen,
Ghelijck een Moeder is ghesint,
Om te bewaren haer lieve kindt,
Soo sal y sorghe voor u draghen.
O Juda ende Bethlehem,
Slaet gaed' ws Bruyd'goms comste,
En wilt ontfanghen hem,
Of ghy werdt die verdomste,
Soo die steden Sidon en Tyro:
Ghelijck om vielen te Jericho
De hooghe stercke mueren,
Soo sal't noch eens met u vergaen,
Wildy uwen Bruydegom niet ontfaen,
| |
[pagina 83]
| |
Veel drucx sult ghy besueren.
O dochter van Zion,
Ghy zijt Christi Bruydt eersame,
Hy is u vroom campion,
Seer groot soo is sijn fame,
Die u seer bemindt end' is coragieus,
Ende van u seer amoureus,
Gheheel sijn lichame
Heeft hy voor u te pande ghestelt,
Ghy en zijt niet ghecocht met gout, silver, oft ghelt,
Maer met sijnen bloede bequame.
Princesse van Israel,
Jerusalem van Godt vercooren,
En vreest voor gheen ghequel,
V Coninck die sal u aenhooren:
Aenroept hem als ghy zijt beswaert,
Ghelijck een Henne haer kiekens bewaert,
Al voor der Wouwen spooren,
Soo heeft hy dickwils u bevrijdt
Voor alle die u hebben benijdt,
Als het bleeck in Pharaos versmooren.
|
|