Troost der siecken ende overleden

[p. 223]

Een Roosen-cransken van de heylighe Maghet Maria, in vijf deelen bedeylt, vereert met het leven ende wercken van Iesvs Christvs.

Het eerste deel.

Pater noster, &c. Aue Maria, &c. O goedertieren ende soete moeder Maria, versoent onsen bermhertighsten Verlosser Iesus Christus, den welcken ghy aldersuyverste Maghet door de bootschap des Aerts-enghels vanden heyligen Geest in de Stadt van Nazareth ontfanghen, ende neghen maenden in u suyverste lichaem ghedraghen hebt. Maeckt, dat wy uwen soetsten Sone Iesus Christus behaghen, ende hem ende u in den hemel mochten aenschouwen, Amen.

Aue Maria, &c. O goedertieren ende soete Moeder Maria, versoent onsen bermhertighsten Verlosser Ie-

[p. 224]

sus, den welcken ontfanghen hebbende, vol van Godt, uwe Nichte Elisabeth metter haesten zijt gaen besoecken, ende hebt haer ghegroet ende ootmoedelijck gedient. Maeckt, dat wy uwen soetsten Sone Iesus Christus behaghen, ende hem ende u in den hemel mochten aenschouwen, Amen.

Aue Maria, &c. O goedertieren ende soete Moeder Maria, versoent onsen bermhertighsten Verlosser Iesus, den welcken ghy ongheschende maghet, in eenen verworpen stal niet alleen sonder pijn, maer oock met een on-uytsprekelijcke blijschap ghebaert, ende naer sijne gheboorte stracks als waerachtigh Godt met een devoot herte aenbeden hebt. Maeckt, dat wy uwen soetsten Sone Iesus Christus behaghen, ende hem ende u in den hemel mochten aenschouwen, Amen.

Aue Maria, &c. O goedertieren ende soete Moeder Maria, versoent onsen bermhertighsten Verlosser Iesus, den welcken ghy een cleyn

[p. 225]

schreyende kindeken met u maeghdelijck sogh ghespijst, ende in doeckskens ghewonden, op hoy ende stoppelen in een kribbeken gheleyt hebt. Maeckt, dat wy uwen soetsten Sone Iesus Christus behaghen, ende hem ende u in den hemel mochten aenschouwen, Amen.

Aue Maria, &c. O goedertieren ende soete Moeder Maria, versoent onsen bermhertighsten Verlosser Iesus, den welcken de Enghelen met vrolijckheydt, als hy eerst gheboren was, den herderkens bootschapten, ende met blijde stemmen lovende den menschen van goeden wille vrede hebben vercondight. Maeckt, dat wy uwen soetsten Sone Iesus Christus behaghen, ende hem ende u in den hemel mochten aenschouwen, Amen.

Aue Maria, &c. O goedertieren ende soete Moeder Maria, versoent onsen bermhertighsten Salighmaker Iesus, den welcke de herderkens, metter haesten naer Bethleem reysende, in een kribbeken ghevonden

[p. 226]

hebben, ende met een groote verwonderinghe ende blijschap aenbaden. Maeckt, dat wy uwen soetsten Sone Iesus Christus behaghen, ende hem ende u in den hemel mochten aenschouwen, Amen.

Aue Maria, &c. O goedertieren ende soete Moeder Maria, versoent onsen bermhertighsten Salighmaker Iesus, den welcken op den achsten daghe naer sijne gheboorte hem gheweerdight heeft sijn suyverste Bloet voor ons uyt te storten ende besneden te worden, ende tot onsen troost Iesvs ghenaemt te zijn. Maeckt, dat wy uwen soetsten Sone Iesus Christus behaghen, ende hem ende u in den hemel mochten aenschouwen, Amen.

Aue Maria, &c. O goedertieren ende soete Moeder Maria, versoent onsen bermhertighsten Salighmaker Iesus, den welcken de Wijse, vanden Oosten comende, godtvruchtelijck ghesocht hebben, ende met een groote blijschap overgoten, door't gheleydt van een sterre tot Bethleem

[p. 227]

ghecomen zijn; ende aldaer, hem ootmoedelijcken aenbiddende, hebben hem devotelijck gout, wieroock ende myrrhe op gheoffert. Maeckt, dat wy uwen soetsten Sone Iesus Christus behaghen, ende hem ende u in den hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesum; den welcken ghy op den viertighsten dagh naer des wets ghebodt in den tempel ghebrocht hebt, ende met de offerande der armer lossende, aen Godt den Vader met een danckbaerste hert op-gheoffert hebt. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; den welcken ghy naer Egypten, door de vreese van Herodes, vanden Enghel vermaent zijnde, als een

[p. 228]

ghetrouste moeder ghedragen hebt, ende den selven ten lesten van daer nae Nazareth wederghebrocht. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen, Amen.

De claer Drijvuldigheyt zy eer:
Den Vader, Soon, en heyligh Gheest:
Lof zy de maeght Godts moeder teer
Nu, en in all' eeuw aldermeest.
Amen.

Het tweede deel.

PAter noster, &c. Aue Maria, &c. O goedertieren ende soete Maria, versoent onsen bermhertighsten Salighmaecker Iesus; den welcken ghy moeder ende maghet, als hy twaelf jaeren oudt was, te Jerusalem verloren hebt, ende hem met droefheydt soeckende naer dry daghen in den tempel blijmoedigh ghevonden. Maeckt, dat wy uwen soetsten Sone Iesus Christus beha-

[p. 229]

ghen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; den welcken ghy neerstelijck met een moederlijcke sorghvuldicheydt op-ghevoeyt hebt, ende niet teghenstaende altijts als den hooghsten Godt een ootmoedige eerbiedinge bewesen heeft. Maeckt, dat wy uwen soetsten sone Iesus Christus behagen, ende hem ende u in den hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; die dertigh jaeren oudt zijnde, uyt ootmoedigheyt heeft willen van sijnen dienaer Joannes in den Jordaen ghedoopt wesen, daer hy nochtans het onnoosel Lam Godts noyt met eenighe smette der sonden besmet is gheweest. Maeckt, dat wy uwen soetsten Sone Iesus Christus behagen, ende hem ende u inden hemel mochten aenschouwen, Amen.

[p. 230]

Aue Maria, &c. O goedertieren ende soete Maria, versoent onsen bermhertighsten Salighmaker Iesus; die in de woestijne viertigh dagen ende viertigh nachten niet nuttende ghevast heeft, ende alsoo met de wilde dieren, wesende Heere van hemel ende aerde gewoont. Maeckt, dat wy uwen soetsten Sone Iesus Christus behaghen, ende hem ende u in den hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; die niet en heeft gheweyghert om onse saligheydt van den duyvel bekoort te worden, ende ons betoont heeft hoe wy den Satan moeten verwinnen. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; den welcken gaende door steden, dorpen ende casteelen het Eu-

[p. 231]

angelie des Rijcks gepredickt heeft, ende gheerne de vermoeytheyt ende arbeydt des lichaems om onsen t'wille verdraghen. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; die dickwils in't ghebedt vernacht heeft, ende hongher, dorst, koude, hitte ende verscheyden vervolginghen met een saechtmoedighste hert om onsen t'wille verdraghen. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; den welcken met de menschen handelende alle bedruckte herten bermhertighlijck heeft gheholpen, ende vele teeckenen ghedaen, ende aen Maria Magdalena ende andere

[p. 232]

sondaren, die een waerachtigh leetwesen hadden, seer weerdighlijck vergiffenisse ghejont heeft, ende met haerlieder ghemeynsaem is gheweest. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; die voor dry discipelen op den bergh in een ander ghedaente verandert, metten aensichte als een Sonne claer heeft geschenen, ende de uytnementheydt van een glorieus lichaem hoogelijck vertoont heeft. Maect, dat wy uwen soetsten Sone Iesus Christus behagen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; den welcken te Jerusalem comende om voor ons te lijden, als een ootmoedigh ende saechtmoedigh Koningh, op een eselinne geseten heeft, ende on-

[p. 233]

der den lof, die het volck hem aenbiede, de stadt aensiende, tranen ghestort heeft. Maeckt, dat wy uwen soetsten Sone Iesus Christus behaghen, ende hem ende u in den hemel mochten aenschouwen, Amen.

De claer Drijvuldigheyt zy eer:
Den Vader, Soon, en heyligh Gheest:
Lof zy de maeght Godts moeder teer
Nu, en in all' eeuw aldermeest.
Amen.

Het derde deel.

PAter noster, &c. Aue Maria, &c. O goedertieren ende soete Maria, versoent onsen bermhertighsten Salighmaker Iesus; die in het leste avontmael ter aerden nedervallende de voeten van sijne discipelen met een groote ootmoedigheydt ghewasschen heeft, ende het hooghweerdigh Sacrament des autaers met een on-uytsprekelijcke liefde inghestelt. Maeckt, dat wy uwen soetsten So-

[p. 234]

ne Iesus Christus behaghen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; den welcken met sijne discipelen in't hofken van Oliveten comende met een overgroote droefheydt om onsten t'wille bevanghen is geweest; ende lanck biddende, een bloedigh sweet over sijn gheheel lichaem, door het ghewelt der benautheydt ghesweet heeft. Maeckt, dat wy uwen soetsten Sone Iesus Christus behaghen, ende hem ende u in den hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; die sijne vijanden te ghemoet gegaen is ende hem van selfs hun overghelevert heeft, ende niet en weygerde van Judas sijnen verrader den kus te ontfanghen. Maeckt, dat wy uwen soetsten Sone Iesus Christus behaghen, ende hem ende u inden he-

[p. 235]

mel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; den welcken de boose menschen onweerdighlijcken hebben ghevanghen ghenomen, als eenen quaetdoender ende moordenaer met harde banden schandelijcken ghebonden Maeckt, dat wy uwen soetsten Sone Iesus Christus behaghen, ende hem ende u in den hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; die tot den oppersten Priester schimpelijck ghebonden zijnde ghebrocht is, ende van een sijn dienaeren een grouwelijcke kaecksmeet ghekregen heeft. Maeckt, dat wy uwen soetsten Sone Iesus Christus behagen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Ie-

[p. 236]

sum; die in't huys van Caiphas met valsche beschuldinghen overvallen is gheweest, ende met stinckende sluymen bespoghen, ende geckelijck sijne ooghen verbonden, ende met vuysten ende souffletten onghenadelijck gheslaghen, ende met blasphemien seer onweerdighlijck vervult is. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Iesus; den welcken versmadelijck nae Pilatus gheleyt, voor hem met een neder-gheslaghen ende stil wesen ghestaen heeft, ende ootmoedelijck sweegh valschelijck vanden Joden beschuldight wesende. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Ie-

[p. 237]

sus; den welcken tot Herodem ghesonden zijnde, ende wijsselijck swijghende, van hem versmaeyt is, ende met een wit cleet als eenen sot ghecleedt. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; die in't Rechthuys schandelijck ontcleet ende aen een colomne onghenadelijck ghebonden is geweest, ende seer wreedelijck met roeyen gegeesselt ende met sijn eyghen Bloedt allendighlijck overgoit is. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; den welcken de boose menschen tot een meerdere bespottinghe eenen purpuren mantel aenghedaen heb-

[p. 238]

ben, ende met scherpen doornen ghecroont, ende geckelijcken aenbeden ende bespot, ende met een riet gheslaghen, ende leelijck bespoghen ende met wreede vuysten ghesmeten hebben. Maeckt, dat wy uwen soetsten Sone Iesus Christus behaghen, ende hem ende u in den hemel mochten aenschouwen, Amen.

De claer Drijvuldigheyt zy eer:
Den Vader, Soon, en heyligh Gheest:
Lof zy de maeght Godts Moeder teer
Nu, en in all' eeuw aldermeest.
Amen.

Het vierde deel.

PAter noster, &c. Aue Maria, &c. O goedertieren ende soete Maria, versoent onsen bermhertighsten Salighmaker Iesus; den welcken een doorne croone, ende een purpuren cleet dragende, uyt het rechthuys van Pilatus gebrocht is, ende den Joden vertoont, ende van haerlieden met

[p. 239]

een groot ende op-roerigh gheroep tot de doot des cruys op-gheeyst. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; die Pilatus onrechtveerdighlijck ter doot veroordeelt heeft, ende aen den wille der Joden overghelevert. Oversulcks is hy stracks van haerlieden met den balck des cruys gheladen, ende heeft dit schandelijck hout op sijne schouderen verduldighlijck met een groote pijninghe ghedraghen; ende gheworden zijnde eenen spot der menschen ende verworpsel des volcks, ootmoedelijck naer den bergh van Calvarien ghegaen is. Maeckt, dat wy uwen soetsten Sone Iesus Christus behaghen, ende hem ende u in den hemel mochten aenschouwen, Amen.

Aue Maria, &c. O goedertieren ende soete Maria, versoent onsen

[p. 240]

bermhertighsten Salighmaker Iesus; die op den bergh van Calvarien met wijn, met myrrhe ende galle ghemenghelt, ghelaeft is gheweest, ende schandelijck ontcleet, ende handen ende voeten wreedelijck doorboort, aenden cruyce ghenaghelt. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; die naeckt ghewont ende versmaeyt aen 't hout des cruyce om onsent wille ghehanghen heeft, ende de bitterste pijnen gheleden, als oock sijn precieus Bloet uytghestort. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen. Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; den welcken in't middel van

[p. 241]

twee moordenaren aenden cruyce hanghende, ende vanden Joden bespot ende geblasphemeert zijnde, een ootmoedighe verduldigheydt vertoont heeft, ende daer en boven noch den vader badt voor de ghene die hem cruysten ende blasphemeerden. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; den welcken aen den moordenaer, een waerachtigh leetwesen hebbende, alle sijne sonden vergeven heeft, ende seer mildelijck de blijschappen des hemels beloofde. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; die met u, sijne alderliefste moe-

[p. 242]

der, als ghy stondt gheheel bedroeft onder den cruyce een innigh medelyden ghehadt heeft, ende u aen Joannes bevolen, ende aen hem ende ons allen u voor een Moeder ghegeven heeft. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; die sijn lijden sonder verlichtinghe van eenighe ghevoelijcke consolatie gheleden heeft: waer over hy oock de swaerheydt sijnder pijnen te kennen gevende, met een helle stemme gheroepen heeft, dat hy van sijnen vader verlaten was. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; den welcken aenden cruyce heel uyt-gebloeyt

[p. 243]

hanghende gheroepen heeft dat hy eenen bitteren dorst hadde, maer is in dese uyterste ellende met galle ende asijn ghelaeft. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; den welcken de doot naeckende sijnen gheest in de handen des Vaders bevolen heeft; ende hebbende nu het werck van onse verlossinghe volbrocht, heeft als eenen goeden herder sijne siele voor sijne schaepkens uyt een loutere liefde gelevert. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen, Amen.

De claer Drijvuldigheyt zy eer:
Den Vader, Soon, en heyligh Gheest:
Lof zy de maeght Godts moeder teer

[p. 244]

 

Nu, en in all' eeuw aldermeest.

 

Amen.

Het vijfde deel.

PAter noster, &c. Aue Maria, &c. O goedertieren ende soete Maria, versoent onsen bermhertighsten Salighmaker Iesus; den welcken de doot voor ons aenden cruyce ghesmaeckt hebbende, stracks met de siele naer der hellen uyt een overgroote liefde ghedaelt is, ende daer uyt sijne vercorenen crachtelijck verlost heeft. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; wiens heylighste zijde in u teghenwoordigheydt met een lancie gheopent, ende amoreus hert ghewont is, waer uyt t'onser bate purpurachtich bloet ende water vloeyde. Maeckt, dat wy uwen soetsten So-

[p. 245]

ne Iesus Christus behaghen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; den welcken ghy van den cruyce ghedaen op uwen schoot (soo wy godtvruchtelijck ghelooven) ontfanghen, ende met traenen overvloedelijck ghewasschen hebt, ende minnelijck ghekust. Maeckt, dat wy uwen soetsten Sone Iesus Christus behagen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; wiens heylighste lichaem Joseph ende Nicodemus door een godtvruchtighe devotie met specerijen ghebalsemt, ende in een wit kleet gewonden hebben, ende in't graf gheleydt. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen, Amen.

[p. 246]

Aue Maria, &c. O goedertieren ende soete Maria, versoent onsen bermhertighsten Salighmaker Iesus; die ten derden daghe verwinder uyt het besloten ende besegelde graf comende, vande doode door sijn eygen cracht verresen is, ende u sijne lieve Moeder ende andere sijne vrienden met een seer ghewenschste vreught verblijt heeft. Maeckt, dat wy uwen soetsten Sone Iesus Christus behaghen, ende hem ende u in den hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; den welcken ten veertighsten daghe naer sijne Verrijsenisse glorieuselijck ten hemel gheclommen is, ende aen de rechter handt des Vaders, als eenen doorluchtighen triumpheerder is sittende. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen, Amen.

Aue Maria, &c. O goedertieren

[p. 247]

ende soete Maria, versoent onsen bermhertighsten Salighmaker Iesus; die den heyligen Gheest over d'Apostelen ende andere geloovige ghesonden, en de selve wonderlijck getroost, versterckt, verlicht ende onderwesen heeft. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; den welcken u sijne liefste Moeder in den hemel ontfanghen, boven de Chooren der Engelen verheven, ende een Koninginne ende opperste Keysererinne ghestelt heeft. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; den welcken in't eynde des werelts een Rechter met een groote Maje-

[p. 248]

steyt comen sal, om den quaden, afgrijselijcke tormenten, en den rechtveerdighen d'eeuwighe blijschappen te vergelden. Maeckt, dat wy uwen soetsten Sone Iesus Christus behagen, ende hem ende u inden hemel mochten aenschouwen, Amen.

Aue Maria, &c. O goedertieren ende soete Maria, versoent onsen bermhertighsten Salighmaker Iesus; die de lieffelijcke ende gewenschste glorie der Salighen is, ende met den Vader ende heyligen Gheest leeft ende regneert Godt in de eeuwe der eeuwen. Maeckt, dat wy uwen soetsten Sone Iesus Christus behaghen, ende hem ende u inden hemel mochten aenschouwen, Amen.

De claer Drijvuldigheyt zy eer
Den Vader, Soon, en heyligh Gheest:
Lof zy de maeght Godts moeder teer
Nu, en in all' eeuw aldermeest.
Amen.