Koock-boeck ofte familieren kevken-boeck

[p. 66]

Hier naer volghen sommige manieren op den rooster te braden.

Hoemen een Borst-stucxken van een Kalf op den rooster sal braden.

NEemt het Borst-stucxken ende laet het sieden tot dat het meer als half genoech is, laet het dan wederom cout worden, bestroot het dan wel met sout ende venckel, leght het op den rooster met een stucxken speck daer op, om dat het mals soude blijven, laet het dan voorts braden tot dat het ghenoech is, dient het met ghefruytten ayun daer over, oft met wat pepers ende sap van oranien oft eenighe andere sauce.

Hoe datmen een Kalfstongh op den rooster sal braden.

ALs de tonghe gesoden sal wesen ende het vel afgedaen gelijck het behoort, ist datse cleyn is salmense heel nemen, maer ist datse redelijck groot is, soo salmense clieven lanckx door, ende wel wentelen in venckel, gheraspt broot ende ghestooten sout, leghtse soo op den rooster met een stucxken speck daer op, ende keertse diverse reysen, tot datse het couleur ghenoech ghenomen heeft: dan dientmense met suycker ende sap van aranien daer over, warm ter tafelen.

Hoe datmen een Hamels-borst op den rooster sal braden.

LAetse sieden ende alsse meer dan half ghesoden sal wesen, laetse dan liggen een ure lanck in

[p. 67]

adobbi van azijn, wat nieuwen wijn, oft in plaetse van dien eenigen anderen stercken ghelijck spaenschen wijn, met wat loock en peper, neemtse dan uyt ende wenteltse wel in bloeme, ende leghtse soo by den rooster, is seer delicaet.

Hoe datmen den steert van eenen Hamel op den rooster braeyt.

DEn steert van eenen Hamel salmen laten sieden, ende nemen hem dan uyt het sop, ende bestrooden hem wel met venckel, geraspt broot ende sout, leght hem dan op den rooster, ende alsmen hem ter tafelen dient maecktmen een sauce van azijn van roosen, van suycker ende sap van aragnien. Men moet wel mercken datmen den steert diemen sus braden wilt, van eenen jonghen ende vetten Hamel crijcht, want anders en soude daer niet wel toe dienen: gelijck de Neerlantsche Joffrouwen weten, die het daghelijckx proeven.