Koock-boeck ofte familieren kevken-boeck

Visch, ende ander neutrale Pottagien.

Hoemen een Eyken Lombaerts maeckt.

NEemt ses doyeren van versche eyeren, cloptse wel cleyn, met wat waters, ende daer on-

[p. 26]

der wat Wijns, een cleyn roomerken van elckx, doeter dan wat roose waters by, ende een vierendeel van het beste suycker, ende settet soo in een schotel op een Koffoir met vier, roert het altoos, tot dat het beghint dick te worden: ende als ghy merckelijcken siet dat het stolt, dan is het genoech, neemt het dan af, ende dient ter tafelen.

Spaensche Pap.

TOt eenen pot melckx, neemt acht doyeren van eyeren cleyn gheclopt, twee oncen blomme van rijs, ses oncen suyker van't beste, ende als sy ghesoden is, ende in schotelen gherecht, machmense bestroyen met fijn Suycker.

Pottagie van ghesouten Campernoelien.

SEt de Campernoelien te weyck, den tijdt van acht uren, maer verandertse dick-mael van schoon water: t'leste water lauw sijnde, proeft met den vingher oft sy onstsouten sijn: ontsouten sijnde snijtse in cleyn stucxkens, doetse in eenen pot met olie daer by, naer discretie, vande beste diemen vinden can, doeter by een weynich ayuns, cleyn ghestooten, oft ghehackt, laetse soo stoven van langher handt, met wat peper, canneel ende saffaraen, ende als het by naer volcomentlijck sal ghestooft wesen, doeter een weynich Amandelmelck by, ghemenght met wat verjuys, ende een handts-volleken ghedroocht cruyt, wat corenten, ende latet dan voorts stoven, dient het dan ter tafelen, met wat suycker ende canneel daer over.

[p. 27]

Pottagie van Erten en Boonen.

NEemt versche Erten ende Boonen, doetse uyt de oude, in eenen pot met wat vande beste olie, ende wat saffaraens daer by, ende soo veel waters, datse twee vingheren meer als bedeckt sijn, ende als sy by naer sullen ghekockt wesen, neemt de helft uyt, ende stootse in eenen Mortier met wat groen cruyt, ende roert het dan met wat van't selve sop, ende siedtse dan wederom altemael t'samen, ende dient het soo warm ter Tafelen.

Pottagie van herte Eyeren.

NEemt Eyeren hert ghesoden, vier oft ses, naer discretie, snytse in cleyn stucxkens, doeter veel Corenten by, ende wat wijn, water ende boter, stooft het al te samen.

Pottagie van Slacken.

GHy sult de Slacken eerst in lauw water te weyck legghen, ende wel stijf ruyssen ende wassen, datter gheen sant oft vuylicheyt ontrent en zy, ende dan doet-mense in een ander potteken, oft ketelken met vers lauw water, soo datse twee vingheren onder het water blijven, soo laetmense sieden lancksamelijc, houwende het potteken dick gestopt, tot datmen siet datse al uyt de huyskens comen sijn: neemtse dan met een vispaen uyt het water ende captse, maer dat tamelijck groot, doeter dan by wat olie, peper, sout, canneel en saffaraen, wat gedroocht cruyt, verjuys ende soppekens van loock ghestooten oft ghebroken, ende laetse voorts sieden in't selve water, noch ruym een

[p. 28]

quartier urs, ende dan dientmense met hun sop ter tafelen, ende is wonderlijck exquies.