Hemelsch nachtegaelken oft gheestelijcke liedekens, om deught met vreught te beoeffenen

[p. 193]

Liedeken, waer in de ziele beclaeght, datter soo luttel menschen staen nae 't beste, ende 't selve haer soo weynich willen laten costen;

Op de wijse: Maria foneyne vol deughden &c. Oft: Gheseghent zijn mijns Liefs bruyn ooghen &c. Oft: Comt nu, o ziel, vol van &c. Siet fol. 124.

1.

OCh hoe seer ist te beclaghen,
Dat soo luttel 't hunne waghen,
Om te vinden 't schoon juweel,
Daer sy al-ghelijck nae sporen,
Die met Maria dit verkoren
Hebben voor het beste deel.

[p. 194]

 

2.

 

'T zijn, eylaes, maer rechts de schelpen,

 

Daerder veel haer mee behelpen,

 

Sonder 't smaecken des keerens soet.

 

Sy laeten haer alleen ghenoeghen

 

Met de letter, sonder proeven

 

En gheest, die ons verheughen moet.

 

3.

 

Daerom en wilt niet veel aen-hooren,

 

Die u in desen wegh verstooren;

 

Maer hoort altijts toe nae Godts vermaen:

 

Die inwendich u comt nooden,

 

Om uw' quay natuer te dooden,

 

En te trecken Christum aen.

[p. 195]

 

4.

 

Niet met kouten oft veel schrijven;

 

Maer met swijghen stil te blijven

 

Wordt dees conste achterhaelt.

 

Als den gheest hem gaet vernieten,

 

Noch gheen sterven laet verdrieten:

 

Als dan in hem dees wijsheyt daelt.

 

5.

 

Dit sien wy allen dagh gheschieden

 

Meer in slechte, simpel lieden,

 

Als in meesters hoogh van verstandt:

 

Die sonder quay natuer te sterven,

 

En der sinnen lust te derven

 

Meynen te krijghen dese pandt.

[p. 196]

 

6.

 

Sy zijn verdoolt nae Christus segghen,

 

D'welck niemant en can weder-legghen:

 

Want Godt dees peerel openbaert

 

Aen de ootmoedighen ende cleynen,

 

Die recht staen in een Godts meynen,

 

Noch erghens mee en zijn beswaert.

 

7.

 

Dit zijn d'aenbidders, die Godt behaghen:

 

Want al om al sy't vroolijck waghen:

 

Alleen sy hooren nae sijn stem.

 

Sonder te letten op 't menschen praten,

 

Staen sy bloot, in als ghelaten:

 

En versincken gheheel in hem.

[p. 197]

 

8.

 

O ziel verheven, sonder beyden

 

Wilt u hier toe te deegh bereyden,

 

Daer ghy om meest gheschapen zijt.

 

Soeckt ghy de waerheyt te beschouwen,

 

Soo moet gh' u boven schepsel houwen,

 

Boven plaets en boven tijt.

 

9.

 

Wilt daerom met al uw' krachten

 

Dees volamecktheyt heel nae-trachten,

 

Die men als verborghen vint.

 

Want het is Godts Vaders wenschen,

 

Ons te sien volmaeckte menschen,

 

Die hy al te seer bemint.

FINIS.