Hemelsch nachtegaelken oft gheestelijcke liedekens, om deught met vreught te beoeffenen

Liedeken, waer in Godt een yder tot hem roept, belovende alle goedt; Op de wijse : Ach Amarillis, seght vvat u vvil is. (oft) Boerinneken als ghy gaet vvater haelen.

1.

O Dwase menschen,
Hoe kondy wenschen,
Te suyghen 'swerelts schrale borsten?
Och of sy hier voor u haer boesen schorsten!
Dees vreught is maer een schyn,
Dit sogh is quaet fenyn;
Ick ben de medecyn,
Wilt na my dorsten.

[p. 5]

 

2.

 

Wie loopter drincken

 

Waters die stincken,

 

Daer by hem springhen claer fonteynen?

 

Kondy dan, o mensch, vermakelijck meynen

 

Tot modder-dranck te gaen,

 

Fonteynen laten staen,

 

Die open zijn ghedaen,

 

Om u te reynen?

 

3.

 

Drinckt uyt mijn wonden,

 

Met volle monden,

 

Gheen dorst en sal u oyt bevanghen:

 

U sin en sal niet meer na d'aerde hanghen.

 

Den onghesonden lust

[p. 6]

 

Sal worden uyt-gheblust,

 

V ziele sal met rust

 

Na my verlanghen.

 

4.

 

Laet ander loopen,

 

En broot gaen koopen;

 

Ick wil u met mijn vleesch versaden:

 

Een voetsel, dat u niet sal over-laden;

 

Een spijse, die soo smaeckt,

 

Dat s'enghelen vermaeckt,

 

En menschen, daer s'in raeckt,

 

Doet al versmaden.

 

5.

 

Wilt my aen-cleuen,

 

Ick sal u gheven,

[p. 7]

 

Dat in gheen werelt is te halen,

 

Al wilde ghy 't met al u goede betalen;

 

Een herte on-ghepijnt,

 

Een vreught, die noyt verdwijnt,

 

Een licht, dat altijdt schijnt

 

Met nieuwe straelen.

 

6.

 

Noch sal ick sparen,

 

En veel bewaren,

 

Dat ghy hier boven mooght ghenieten:

 

Daerom laet u wat lijdens niet verdrieten.

 

Ick sal u naer u doot

 

In Abrahamens schoot

 

Met weelden wonder groot

 

Heel over-gieten.