Soema no tranga moes koni. Wie niet sterk is, moet slim zijn

[p. 12]

Lodi nanga Tigriaant.

Wan dei wan ontiman di den ben kari Lodi, ben teki en gon foe go ini boesi go soetoe meti. Lodi ben de wan boen ontiman, di ben soetoe grontapoe. Te Lodi soetoe a no abi misi. Lodi ben libi ini a pranasi Sabakoe ini Para. Froekoe mamanten Lodi lai en boto foe go na ontiboesi. Lodi frow nanga pikin bigin foe poti watra na faja foe krin meti. Ala sma ini a pranasi e taki foe a fasi fa Lodi e soetoe gon. No wan man ben de ini a pranasi di ben kan tnapoe na sei Lodi.

[p. 13]

Di Lodi doro ini a boesi, a fosi meti di a soetoe na Konkoni. Heri dei Lodi soetoe meti. A soetoe srefisrefi. Ete wan pikinso dan joe kan taki dat a soetoe ala den meti foe a boesi kiri.

Ma now Tigri di ben de kownoe foe den meti, loekoe a sani go a loekoe a sani kon. A taki: ‘Mi na kownoe foe a boesi nanga den meti. Stimofo san mi no e feni, na dati Lodi e feni. Mi sabi san mi o doe nanga en. A no sa onti noiti moro ini mi boesi.’ A pisten san Tigri e broko en ede nanga Lodi, a soetoe psa tinafeifi meti kba.

Di Lodi soetoe den meti, a tjari den go na fesisei foe a boesi pasi. Tigri kisi boskopoe foe mati Powisi taki Lodi

[p. 14]

de baka ini a boesi. Wantewante Tigri teki pasi foe go soekoe Lodi. Di Lodi ben wani go kari wantoe man foe kon jepi en nanga den meti, a miti nanga Tigri. Tigri taki: ‘Lodi, joe e soetoe ala den meti ini mi boesi. San na den meti di joe kiri tide? Joe moe kari den na nen gi mi!’

Lodi tnapoe nanga bigi ai. Ai beifi leki wan blad.

Tigri singi wan singi gi Lodi. A singi: ‘Serenamoe namoe namoe, serenamoe namoe namoe. Joe moe kari den boeba nem nem nem.’

[p. 15]

Lodi e beifi. A bigin taki: ‘Disi na Konikoni; disi na...’ A kari ala den meti nen te leki a doro na tigrimeti srefi. Ma now Lodi sabi dati efoe a kari tigrimeti, ai go dede. Dat'ede a kibri a tigri boeba. Ma poti foe Lodi, Tigri si en. Tigri singi ete wan leisi. Lodi taki: ‘Mi kba foe kari den boeba nen.’

Dan Tigri taki: ‘We, efoe joe kba foe kari den boeba nen, mi sa kari joe boeba nen.’ Tigri kiri Lodi, a njan en. Noiti moro wan sma jere noso si wan sani foe Lodi, a bigi ontiman foe Sabakoe.