Soema no tranga moes koni. Wie niet sterk is, moet slim zijn

[p. 16]

Sekrepatoeaant.

Dia taki: ‘No wan meti e lon moro mi.’ Sekrepatoe taki: ‘No wan meti no koni moro mi.’ A tori disi na wan tori di o leri oenoe taki: ‘Soema no tranga moes koni.’

Wan dei Sekrepatoe go na Dia. A taki: ‘Mati Dia, kon meki oen strei lon.’ Ma oen sabi taki Sekrepatoe no man lon so boen. Ma tog Sekrepatoe taigi Dia taki meki den strei lon.

Dia loekoe Sekrepatoe, a lafoe. Dia prakseri taki na foe soso ai go lasi en ten. Ma Sekrepatoe taki: ‘Dia, na foe di joe e frede joe e taki dat joe o lasi joe ten foe soso? Kon meki oen strei lon, man.’

Dia denki a tori, a taki: ‘A boen. Tamara oen o strei lon.’ Den taki dati den o lon wan pasi foe tin kilometer. Ala den tra meti o go loekoe a lon disi. Den o tnapoe na pe a kba pisi foe a lon de, foe si soema fosi o doro. Tamara tin joeroe den o strei lon. Tigri na a man di o gi den a marki foe bigin. A lon bo go so: Ala toe kilometer den bo stop foe dringi pikin watra.

[p. 17]

Sekrepatoe djoekoe en pata, Dia djoekoe en pata. Sekrepatoe klari, Dia klari. A joeroeten Tigri knoroe den bigin lon. Dia teki wan vaart. A pisten di Dia doro na a fosi presi pe den o stop, soema a si drape? Sekrepatoe. Dia aksi Sekrepatoe taki: ‘Fa a kan taki joe doro so esi?’

Sekrepatoe piki taki: ‘Mati, kon meki oen strei lon.’

Na so ala leisi te den moes stop, Sekrepatoe e doro fosi Dia. A pisten di Dia doro na a kba foe a strei, a si

[p. 18]

Sekrepatoe sidon e wakti en. Dia no ben man graboe a sani disi. A ben dangra foe a ferstan.

Ma oen sabi fa Sekrepatoe doe doro fosi Dia, nanga ala di Sekrepatoe no e lon moro Dia? We, Sekrepatoe wini a strei so. Na ala den presi pe den moesoe stop, Sekrepatoe poti wan tra sekrepatoe. Na so ala leisi Dia e si a sekrepatoe. Ma Sekrepatoe no lon tin meter srefi. So, soema no tranga moes koni.