Soema no tranga moes koni. Wie niet sterk is, moet slim zijn

[p. 8]

Anansi nanga Tigriaant.

Anansi nanga Tigri ben de boen mati. Ala sani den toe disi ben doe makandra. Den ben go makandra na frijari-oso te wan foe den ben kisi wan kari. Wan dei Anansi prakseri: ‘Sortoe wan foe oenoe moro tranga noso koni?’ Dan Anansi taki nanga ensrefi taki: ‘Mi o hori wan strei nanga Tigri.’

So wan dei Anansi hori wan strei nanga Tigri. Den bo loekoe sortoe wan foe den moro tranga noso koni. Den meki mofo foe a dei san den bo hori a strei. Anansi taigi Tigri taki: ‘Tigri, joe fosi moesoe naki.’

[p. 9]

Tigri taki: ‘Anansi, joe fosi kan naki.’ Den taki go den taki kon. Tigri taki: ‘A boen, Anansi. Mi fosi sa naki.

A presi pe den bo hori a strei na wan pikin kamra. Te joe go ini a kamra dati, dan joe moes soetoe joe ede kon na doro. Sofasi a trawan kan naki joe na joe ede.

Di Tigri bo naki Anansi, dan Anansi weri wan isri patoe na en ede, sodati te Tigri o naki, a o kisi mankeri. Tigri drai en kofoe. A naki Anansi so bam! Tigri djompo go na loktoe. A bari. A pisten di a loekoe en anoe, en her anoe e broedoe. Tigri aksi Anansi: ‘Na joe ede nomo tranga so? Ma no span. Mi o kisi joe baka.’

[p. 10]

A anoe foe Tigri kisi so wan bigi mankeri dati a ben abi foe go didon na ati-oso. Ini ati-oso den ben gi en papa foe dringi, foe kisi krakti baka. Tigri didon ini ati-oso, ma a ben koekoe foe atibron. Bika a sani di Anansi doe nanga en hati en. A ben wani kiri Anansi nomonomo. En frow go loekoe en na ati-oso. En a frow warskow en foe no feti moro nanga Anansi. Ma Tigri nanga en atibron no e jesi a sani san a frow ben e taki srefisrefi. A taki: ‘Mi o kiri Anansi nomo.’

Ma Anansi ben sabi taki efoe a naki Tigri, a o de soleki wan freifrei sidon na tapoe en ede. So Anansi dringi dresi wakti siki. Anansi meki wan boen bigi mokro. A mokro ben hebi, sodati en wawan no ben man opo en. A kari en frow nanga en pikin foe kon jepi en opo a mokro.

[p. 11]

Di Tigri kmopo na ati-oso kon, a taigi Anansi taki a feti e go doro. Tigri psa go ini a kamra. A soetoe en ede kon a doro. Dan Anansi, en frow, nanga en pikin opo a mokro. Den naki Tigri so baam!! Tigri bari: ‘Aaauw!! Mi mama. A kiri mi!’

Tigri fadon nanga baka. A skopoe nanga en foetoe. Tigri dede. Tigri nanga ala en tranga dede.