Versamelde gedigte

1945: Die Nuwe Jaar

'n Sesde jaar van jammerlike stryd
Maar goddank met 'n groter kans op seen
En minder om 'n treurspel te beween
Een met die trotse vaste sekerheid
Van eindlike oorwinning. Vyf jaar deur
Het haat en nyd en bitter smart en pyn
Die volkere geteister. Groot en klein
Het saam 'n las gedra en saam getreur
Toe was dit donker soos op middernag
Waar alles koud en bang en hooploos is
En niemand sterk voel in sy eie krag
Nou blink die dagbreek van 'n nuwe dag
'n Ryk belofte vir die lawenis
Waarna die hele mensdom lydend smag.

M.P.O. Burgers-versameling