Dye hystorien ende fabulen van Esopus

§ (47) Die seuende fabule is vanden hert ende vanden iagher die seyt Het ghebuert | dicwijlen datmen mysprijst dat ghene datmen louen ende prijsen soude Ende prijst | ende looft datmen met rechte mysprijsen soude. Waer af dat Ezopus vertelt | [15] eene aldusdanighe fabule: |

HEt was een hert die dranck wt eene fonteynen Ende int drincken soe sach hi | sijn ghehoornde hooft. waer om hij sijn hoornen zeer was prijsende. mer sien | de sine voeten die smal waren ende magher vernederde hijse te mael zeer ende | myspreesse Dese hert als hij vter fonteynen aldus drinckende was hoorde die | [20] stemmen ende dat ghebas vanden honden ende wilde zeer snellijcken inden bossche | vlyen Ende als die honden hem ghenakeden ende achter hem liepen Soe wert | hij by sine groote hoornen in eene haghe ghehouden. Ende siende dat hij niet |

[fol. C3r]

ontcomen noch ontloopen en mochte sprack in hem seluen aldus Ic hebbe tot | anderen tyden myspresen mijne voeten die mij nochtans dicwijl nutte ende oer- | baerlijck waren Ende mijn hoornen die mij nv doen steruen heb ic ghepresen ende | ghelouet Ende hier om soe salmen mysprijsen dat ghene dat niet goet noch nutte | [5] en is Ende louen ende prijsen dat ghene dat goet is ende oerbaerlick Dats te weten. ghij sult prijsen beminnen ende lief hebben die heylighe kercke ende haer gheboden | twelck zeer goet ende profitelijck is Ende sultste vlyen scuwen ende mysprijsen alle | sonden ende scande die welcke sijn dinghen die quaet sijn ende onoerbaerlijck | scandelijck ende bescadelijck |