§ (33) Die derthiende fabule is vanden vos ende vanden crane die ons leert Dat nye | mant en sal den anderen doen dinghen die hi niet en wilde datmen hem dede Waer | af dat Ezopus vertelt eene aldusdanighe fabule. |
HEt was eens een vos die welcke den craen met hem ten auontmael om te eten | [5] ghenodet hadde Ende als die crane met hem teten ghecomen was. soe leyde hi | hem sijn spijse in een platte panne Daerse die crane niet wt nemen en mocht welc | den crane zeer mishaghede ende ghinck vanden huyse van reynardt al hongherich | int huys daer hi selue woenachtich was Ende want die vos reynardt hem bespot | ende verscalct hadde soe ymagineerde hi in hem seluen peynsende hoe hij den vos | [10] reynardt weder om eens bespotten ende verscalcken mochte. wantmen ghemeen- | liken seyt Van gode moet hi sijn ghecroont. die den rechten hoonaert hoont Ende | daer om soe noode hij den vos weder om dat hij sijn auontmael met hem eten | wilde Ende hij leyde hem sijne spijse in eenre kannen mit eenen langhen enghen | hals die van gelas ghemaect ende ghebacken was Ende als die vos eten wilde | [15] soe en conste hij anders niet doen dan dat hy die voerghenoemde kanne met- | ter tonghen leckede Ende aldus bekende hij dat hi bedroghen was Ende die | crane sprack tot hem Nemet nv van alsulck goet als ghij mij ghegheuen hebt | Dit horende die vos scaemde hem des ende is droeffelijcken tot sinen huyse | ghegaen. want daer hi mede gheslaghen hadde. metten seluen stock. wert hy | [20] gheslaghen op sinen cop Ende daer om die anderen hoont ofte scalcheyt doet | wert bywijlen gheerne weder om bedroghen. wantmen daer af groote verdien | ste heeft. alsmen den rechten scalck verscalct die altoes in valscheyden leeft. |
Auteursrechtelijk beschermd