Ekspreshon ku nomber di insekto
Ta manera pispis a kai den nan famia (ta uza e ekspreshon aki ora den un famia tin hende ta muri tra'i otro i den un tempu relativamente kòrtiku).
Barbulètè ta bula na lampi te ora e kima su ala. (bo ta sigui prufiá te ora bo haña bo desgrasia).
Komehein ta traha kas pa prikichi buta aden (un ta traha i otro ta probecha di su trabou).
Sintura di manundèngè (o sintura di maribomba). (un sintura delega). Lo mi bira guruguru, drenta nan wowo (mi no ta tolera e kos ei i lo mi bringu'e fuertemente) (esaki ta ekspreshon ku hende muhé sa uza). Vruminga n' sa mula maishi, ma su wela ta bende hariña (mi ta haña e kaso mashá sospechoso!)
Manchi parse muska morto (e ta un sokete sin brio ni energia). Chebu ta manera skarpion dek (e tin mal beis, mal humor). Estela no ta laga ni muska bula (e ta masha eksakto, e ta piki pieu). Lo mi n' ke ta un pruga den Yandi su karson (lo mi n' ke ta na su lugá). Pieu di bo kabes ta morde mas duru (bo mes hendenan o famia ta molostiabu mas ku otro).
Vruminga no sa muri bou di barí di suku (si bo ta hasi algu pa bo plaser, ningun esfuerso no ta di mas).
Bo parse hende ku a mata spenikòk; kada be bo ta laga kos kai. E muchanan aki parse praga (nan ta kousami hopi inkomodidat). Bo kabes no ta pa pieu so kome (uza bo sintí). Mi no tin sanger di kakalaka (mi tin sintimentu).
Auteursrechtelijk beschermd