Un selekshon di palabra i ekspreshon. Deel 2

Nomber den ekspreshon

Wan Saya, Viatás	Buchi Wan, Jan
Don Pereré, Chinina	Nachi ku Buena
Ni Sanchi ni Pedro	Ton Platon, Nanzi
Wansitu a subi mesa	Solo a sali Djan na Montaña
Hera Michi, kue Mèmè	Luangu, Shon Kochi kayente
Bai un biaha di Zjil	Perdè San Guan.

Wan Saya tabata un mucha hòmber mashá ferfelu ku tabata kana tenta i molostiá tur hende. Esei a kousa su morto, pasobra den Klip nan a dal e mata ku un barank'i pieda riba un dia ku el a bira demasiadu pomperu. Don Pereré, kada un ku su fishi (kada ken hasi loke ta su kapasidat). Chinina-kome-lubida: un malagradisidu ku a lubida tur fabor ku nan a hasié.

Ei den tabata blo bashí, ni un pushi, ni Sanchi ni Pedro. Wansitu a subi mesa (kos ta malu, no tin nad'i kome). Hera Michi, kue Mèmè: faya den un kaso, logra den otro. Fo'i ora m'a manda e mucha bai hasi un rospondi p'ami, e no a bolbe mas. Parse ku el a bai un biaha di Zjil (bai largu).

Mi kompader Otilio ta un Wan di shete fishi (1. e sa di tur un poko, 2. el a frakasa den tur). Si bo ke gana plaka den nogoshi, bo no mester kumpra Jan bende Jan (kumpra i bende un artíkulo na e mesun preis, sin ganashi). Dos hende ku semper ta kana huntu nan sa yama Nachi ku Buena (tambe Nènèn ku Rèkèntèn).

Ton Platon ta hunga su wega, kada un ta hunga di nan (kada hende

[p. 40]

mester okupa ku su mes asuntu). Nanzi ta bati su kasá ku pal'i funchi tra'i porta (awaseru ta kai ku solo). Un mucha mas sabi ku Nanzi (masha spiertu). Nanzi di: Tur kos ta un purbamentu (si bo no purba, bo no por logra). No binimi ku kuent'i Nanzi (eksagerashon o mintira).

Solo a sali Djan na Montaña (lanta lat, perdè ariba, perdè San Guan). Bo parse Shon Kochi kayente (bo no tin pasenshi, bo ke pa tur kos bini kla mesora). Bistí manera Luangu (na hopi koló ku no ta kombina). Fo'i dia Viatás a bira hudiu, hopi hende a siña bisti (ekspreshon di envidia tokante hende ku tabata pober i awor ta den bon).

E mucha parse un Henri-'n-ke-bai-profos (e ta salta i bula mashá). Manolo a keda meskos ku Duzjeni (e tin kantidat di kos bistí). Beth Haim ta spok (mi stoma ta gruña) (Beth Haim ta nòmber dje santana di hudiu tras di Isla). Si bo forsa busá, busá ta papia latin (busá ta deriva di ‘negros bocales’). Korsou ta mal mama, pero bon madrasa (estranheronan ta haña mihó trato ku yu di tera). Tene kuidou! Tur hende ta laba man, anto abo ta keda Kristu. Un mucha mashá lèguèdè (mashá flaku) (Lèguède ta nòmber di un loá, di origen guineosudanés).